ގެދޮރުވެރިޔާ ސްކީމްގެ ދަށުން 4،000 ފްލެޓް ލިބޭ ފަރާތްތަކުގެ ދާއިމީ ލިސްޓް އާންމުކުރަން އިތުރު ވަގުތު ބޭނުންވާ ކަމަށް ހައުސިން މިނިސްޓްރީން ބުނެފިއެވެ.
މިނިސްޓްރީން ނެރުނު ބަޔާނެއްގައި ބުނެފައިވަނީ، ލިސްޓް އެކުލަވާލުމުގައި ކޮރަޕްޝަނަށް މަގުފަހިވާ ކަންކަން ހުރި ކަމަށް އާންމުންގެ ފަރާތުން ތުހުމަތުތަކެއް ކުރެވިފައިވާތީ، އެ ލިސްޓުގެ ސައްޙަކަން ކަށަވަރުކުރުމަށް އިތުރު ވަގުތު ބޭނުންވާ ކަމަށެވެ.
މީގެ އިތުރުން، މި ސްކީމަށް ހުށަހެޅިފައިވާ 20،697 އެޕްލިކޭޝަން ފޯމު ބެލުމުގައި ކަށަވަރުކުރަންޖެހޭ ގިނަ ކަންކަން ހުރުމާ ގުޅިގެންވެސް އިތުރު މުއްދަތެއް ބޭނުންވާ ކަމަށް މިނިސްޓްރީން ވަނީ ފާހަގަކޮށްފައެވެ.
“ކުރިން އާއްމު ކުރެވިފައިވާ ”ގެދޮރުވެރިޔާ“ ސްކީމްގެ އުސޫލުގެ ދަށުން ހުށަހަޅާފައިވާ 20،697 (ވިހިހާސް ހަސަތޭކަ ނުވަދިހަ ހަތެއް) އެޕްލިކޭޝަން ފޯމު ބެލުމުގައި ކަށަވަރު ކުރަންޖެހޭ ގިނަ ކަންކަން ހުރުމާ ގުޅިގެން، މި މަސައްކަތްތައް ނިންމުމަށް އިތުރު މުއްދަތު ބޭނުންވާތީވެ، މި ސްކީމްގެ ވަގުތީ ލިސްޓާއި ރީ-އިވެލުއޭޝަނާ ގުޅިގެން ކުރިއަށް ގެންދެވުނު މަސައްކަތްތައް މި މަސައްކަތް ނިމުނުހާ އަވަހަކަށް އާއްމު ކުރާނެ ވާހަކަ މަޢުލޫމާތަށްޓަކައި ދެންނެވީމެވެ.” ހައުސިންގ މިނިސްޓްރީގެ ބަޔާނުގައިވެއެވެ.
ނަމަވެސް، މިނިސްޓްރީން އަންގާފައިވަނީ މި ލަސްވުމުގެ ސަބަބުން އެއްވެސް ފަރާތެއްގެ ޙައްޤު ގެއްލިގެން ނުދާނެ ކަމަށާއި، ފްލެޓްތައް ދޫކުރެވޭނީ ޙައްޤުވެރިންނަށް ކަން ކަށަވަރުކުރުމަށް މަސައްކަތްކުރާނެ ކަމަށެވެ. އަދި މި ސްކީމްގެ ވަގުތީ ލިސްޓާއި ރީ-އިވެލުއޭޝަނާ ގުޅޭ ތަފްސީލުތައް މަސައްކަތް ނިމުމުން ވީ އެންމެ އަވަހަކަށް އާންމުކުރާނެ ކަމަށްވެސް މިނިސްޓްރީން ބުނެފައިވެއެވެ.