ވެރިކަންކުރާ ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ)ގެ އެތެރޭގެ އިންތިޚާބުގައި ހުޅުމާލެ އުތުރު ދާއިރާގެ ނައިބު ރައީސްކަމަށް މަލްޝާ ޝަރީފް ހޮވިއްޖެއެވެ.
ޕީއެންސީން ޢާންމުކުރި އެތެރޭގެ އިންތިޚާބުގެ ކެންޑިޑޭޓުންގެ ލިސްޓުގައިވާ ގޮތުން، މަލްޝާ ނައިބު ރައީސްކަމަށް ހޮވިފައިވަނީ އެ މަޤާމަށް ކުރިމަތިލާފައިވަނީ އެންމެ ކެންޑިޑޭޓެއް ކަމަށްވާތީއެވެ. އެހެންކަމުން މަލްޝާ ވަނީ އިންތިޚާބަކާ ނުލައި އެ މަޤާމަށް ހޮވިފައެވެ.
ހުޅުމާލެ އުތުރު ދާއިރާގެ ނައިބު ރައީސްކަމަށް ހޮވުނު މަލްޝާއަކީ، ރައީސް މުޙައްމަދު މުޢިއްޒު މޭޔަރުކަމުގައި ހުންނެވި ދުވަސްވަރު ސިޓީ ކައުންސިލުގައި މަސައްކަތްކުރެއްވި ބޭފުޅެކެވެ. އަދި މި ސަރުކާރުގައި މަލްޝާ ވަނީ ޒުވާނުންގެ މިނިސްޓްރީގައި ޑެޕިއުޓީ މިނިސްޓަރެއްގެ ގޮތުގައިވެސް މަސައްކަތްކުރައްވާފައެވެ.
މިހާރު މަލްޝާ ހުންނެވީ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ އެސިސްޓަންޓް ޑިރެކްޓަރ ކަމުގެ މަގާމުގައެވެ.