2026 ވަނަ އަހަރުގެ ފުރަތަމަ ކުއާޓަރގައި ބޭންކް ކާޑުތަކުގެ ޑޮލަރު ލިމިޓް އިތުރުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވައުދުވެ ވަޑައިގެންފިއެވެ. މިގޮތުން ބޭންކް ކާޑުތަކުގެ ޑޮލަރު ލިމިޓް 1400 ޑޮލަރަށް އިތުރުކުރެއްވުމަށާއި، ރާއްޖެއިން ބޭރަށް ދަތުރުކުރާ ފަރާތްތަކަށް 1000 ޑޮލަރު ބޭންކް ރޭޓުގައި ލިބޭނެ ގޮތް ހަމަޖައްސަވާނެ ކަމަށް ރައީސް މިރޭ ވަނީ ވިދާޅުވެފައިވެއެވެ.
މިހާރު ޢަމަލުކުރެވެމުންދާ ގޮތުން، ޑެބިޓް ކާޑުތަކަށް 250 ޑޮލަރާއި ކްރެޑިޓް ކާޑުތަކަށް 750 ޑޮލަރުގެ ލިމިޓެއް ކަނޑައެޅިފައިވެއެވެ. އަދި ރާއްޖެއިން ބޭރަށް ދަތުރުކުރާ ފަރާތްތަކަށް 500 ޑޮލަރު ބޭންކް ރޭޓުގައި ލިބެމުންދެއެވެ.
ރައީސް މުއިއްޒުގެ ވެރިކަމަށް އެއް އަހަރު ފުރުމާ ގުޅިގެން ބޭއްވުނު ރަސްމިއްޔާތުގައި ވާހަކަފުޅު ދައްކަވަމުން، ޑޮލަރުގެ މައްސަލަ ހައްލުކުރުމަށް ސަރުކާރުން ގިނަގުނަ މަސައްކަތްތަކެއް ކުރަމުންދާ ކަމަށް ވިދާޅުވިއެވެ. މީގެ ތެރޭގައި ފަތުރުވެރިންގެ ބޮލަކަށް ބޭންކަށް މާރުކުރަން ޖެހޭ ގޮތަށް ގަވާއިދު އިޞްލާޙުކުރެއްވުން ހިމެނެއެވެ.
މި ބަދަލާއެކު ޑޮލަރުގެ މައްސަލައަށް ފާހަގަކޮށްލެވޭ ހައްލެއް ލިބިގެންދާނެ ކަމަށް ރައީސް އުންމީދު ފާޅުކުރެއްވިއެވެ.
ސަރުކާރު ކުންފުނިތަކަށް ބޭންކް ރޭޓްގައި ޑޮލަރު ލިބޭނެ އިންތިޒާމް އެގޮތުން ހަމަޖެހިގެން ދާނީ އަންނަ އަހަރުގެ މެދު ތެރެއިން ކަމަށް ރައީސް ވިދާޅުވިއެވެ.