ކުރީގެ ސަރުކާރުގައި ގެދޮރުވެރިޔާ ސްކީމްގެ ދަށުން ދޫކުރި، 4000 ފްލެޓު ލިބޭކަމަށް ލިސްޓު ކުރި މީހުންގެ ތެރޭގައި ފޯމު ހުށަނާޅައި ހަމައެކަނި އައިޑީކާޑު ދައްކައިގެން ވެސް ފްލެޓު ދޫކޮށްފައި އެބަހުރިކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
ރައީސް މުއިއްޒު މިހެން ވިދާޅުވީ، ސަރުކާރަށް 52 ހަފްތާ ފުރުމުގެ މުނާސަބަތުގައި މިރޭ ސޯޝަލް ސެންޓަރުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
މާލެ ސަރަހައްދުން 4000 ފްލެޓް ދޫކުރުމަށް އާންމު ކުރި ފްލެޓް ލިސްޓްގައި ހުރި މައްސަލަތަކުގެ ތެރެއިން އުސޫލާ ހިލާފަށް ކޮށްފައިވާ ކަންކަން ހާމަ ކުރައްވަމުން ރައީސް މުއިއްޒު ވިދާޅުވީ، ކުރީގެ ފްލެޓް ކޮމިޓީގައި ހިމެނޭ ފަރާތްތަކަށް ފްލެޓް ލިބޭ ގޮތަށް މާކްސް ބަދަލުކޮށްފައި އެބަހުރި ކަމަށެވެ.
ހަމައެއާއެކު އުސޫލާ ހިލާފަށް ކުރީ ސަރުކާރުގެ އިސް ވެރިންނަށް ފްލެޓް ލިބޭ ގޮތަށް ލިސްޓްގައި ހިމަނާފައި އެބަހުރި ކަމަށް ރައީސް ވިދާޅުވިއެވެ. ނުފޫޒު ބޭނުން ކޮށްގެން އެއް އާއިލާއެއްގެ ގިނަ މެންބަރުންނަށް ފްލެޓް ބަހާފައި އެބަ ހުރި ކަމަށް ވެސް ރައީސް ވިދާޅުވިއެވެ.
“ނުފޫޒު ގަދަ އާއިލާތަކުގެ، އެއް އާއިލާއެއްގެ އެތައް މެމްބަރުންނަށް ފްލެޓު ދީފައި އެބަހުރި، ޕޯޓަލްއަށް ހުށަހެޅި ފޯމުތަކުގެ އިތުރަށް ފްލެޓުދީފައި އެބަހުރި، މިއީކޮށްފައި ހުރި ކަންތައް، ފޯމު ހުށަނާޅައި، ހަމައެކަނި އައިޑީކާޑަށް ވެސް ފްލެޓުދީފައި އެބަހުރި، އަދި އައިޑީކާޑުގެ އެއްފަޅި، ދެން އެބޭފުޅުން ކޮން ވާހަކައެއްތޯ މި ދައްކަނީ ޕޯޓަލްގެ ބެކްއެންޑުން މާކްޝީޓު ބަދަލުކޮށްފައި އެބަހުރި،” ރައީސް ވިދާޅުވިއެވެ.
އަދި ފޯމް ހުށަނާޅާ ހަމައެކަނި އައިޑީ ކާޑުގެ ކޮޕީއެއް ހުށަހެޅީމައި ވެސް ފްލެޓް ދޭ ލިސްޓްގައި ހިމަނާފައި އެބަހުރި ކަމަށާއި އަދި އެއީ ވެސް އައިޑީކާޑުގެ އެއްފަޅި ހުށަހަޅައިގެން ކަމަށް ރައީސް މުއިއްޒު ވިދާޅުވިއެވެ.
މިފަދަ މައްސަލަތައް ހުރުމުން ފްލެޓް ލިސްޓް އާންމު ކުރުން ލަސްވަމުން އަންނަ ކަމަށާއި މިހެން ކަން ވެފައި އޮތުން ލަސްވާނެ ކަމަށް މުއިއްޒު ވިދާޅުވިއެވެ. އެހެންކަމުން މި މައްސަލަތައް ބަލައި އިންސާފު ވެރިކަމާ އެކު ފްލެޓް ލިސްޓް އިއުލާން ކުރާނެ ކަމަށް ރައީސް މުއިއްޒު ވިދާޅުވިއެވެ.