އަންނަ އަަހަރުގެ ރޯދަމަހު ކޮންމެ ގެއަކަށް ސަރުކާރުން މަސްދަޅު ކޭހެއް ދޭނެ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
އެކަން ހާމަކޮށްފައިވަނީ، މި ސަރުކާރަށް އަހަރެއް ފުރުމާއި ގުޅިގެން ސޯޝަލް ސެންޓަރުގެ ހޯލްގައި ބޭއްވި ޖަލްސާގައި ރައީސް ވާހަކަފުޅުދައްކަވަމުންނެވެ.
އެގޮތުން ރައީސް ވިދާޅުވީ ގޭބިސީތަކަށް މަސްދަޅު ކޭސް ދިނުމަށް ވާންޖެހޭ ތައްޔާރީތައްވުމަށް އެސްޓީއޯއަށް އަންގަވާފައިވާނެ ކަމަށެވެ.
“ކުރިއަށް އޮތް ރަމަޟާން މަހަށް އަޅުގަނޑުމެން ގަސްދުކުރަނީ، އެސްޓީއޯގެ އެމްޑީ އަށް އަޅުގަނޑު ދަންނަވައިފިން ކާޑުގެ ބަދަލުގައި ކޮންމެ ގެއަކަށް މަސްދަޅު ކޭހެއް ހިލޭ ދޭން،” ރައީސް ވިދާޅުވި އެވެ.
ރައީސް ފާހަގަކުރެއްވި ގޮތުގައި، މި އަހަރުގެ ރޯދަމަހަށް ހާއްސަ ކޮށްގެން ކަރަންޓާއި ފެން ބިލުން ޑިސްކައުންޓެއް ދީފައި ވާނެ އެވެ. އެއީ 142 މިލިއަން ރުފިޔާގެ ޑިސްކައުންޓެކެވެ.
އަންނަ އަހަރު ރޯދަމަހު ސަރުކާރުން ގޭބިސީތަކަށް މަސްދަޅު ކޭސް ދޭން ނިންމާފައިވާއިރު މިދިޔަ ރޯދަ މަހު ކޮންމެ ގެއަކަށް ހަނޑު ބަސްތާއަކާއި ފުށް ބަސްތާއެއް ސަރުކާރުން ވަނީ އެސްޓީއޯ މެދުވެރިކޮށް ދީފަ އެވެ. އެކަމަށް ވަރަށް ބޮޑު ތަރުހީބެއް ލިބިފައިވާ ކަމަށް ރައީސް މުއިއްޒު ވިދާޅުވި އެވެ.