އަންނަ އަހަރު މާލެ ސަރަޙައްދުގައި 15,000 ހައުސިންގ ޔުނިޓާއި އަތޮޅުތެރޭގައި 12,940 ހައުސިންގ ޔުނިޓް އަޅަން ފަށާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ސަރުކާރަށް އެއް އަހަރު ފުރުން ފާހަގަކުރުމަށް ރޭ ބޭއްވުނު ރަސްމިއްޔާތުގައި ވާހަކަފުޅުދައްކަވަމުން ރައީސް ވަނީ މި މަޝްރޫޢުތަކަށް 2.5 ބިލިއަން ރުފިޔާގެ ބަޖެޓެއް ކަނޑައަޅާފައިވާކަން ފާހަގަކުރައްވާފައެވެ. މިއީ މީގެ ކުރިން އެއްވެސް ސަރުކާރަކުން ބޯހިޔާވަހިކަމަށް ކަނޑައަޅާފައިނުވާ ވަރުގެ ބޮޑު އަދަދެއްކަންވެސް އެމަނިކުފާނު ފާހަގަކުރެއްވިއެވެ.
މި މަޝްރޫޢުގެ ދަށުން ގިނަ އަދަދެއްގެ ހައުސިންގ ޔުނިޓްތައް އެޅުމަށް ހަމަޖެހިފައިވާ ރަށްތަކުގެ ތެރޭގައި ކުޅުދުއްފުށި ސިޓީ (3,000 ޔުނިޓް)، ބ. އޭދަފުށި (1,000 ޔުނިޓް)، ލ. ގަން (1,000 ޔުނިޓް) އަދި އައްޑޫ ސިޓީ (1,000 ޔުނިޓް) ހިމެނެއެވެ.
މީގެ އިތުރުން، ހުޅުމާލޭގައި 2,100 ސޯޝަލް ހައުސިންގ ޔުނިޓް އެޅުމަށް ވަނީ ނިންމާފައެވެ. އަދި ރަސްމާލެ ޕްރޮޖެކްޓްގެ ދަށުން 65,000 ހައުސިންގ ޔުނިޓް އަޅާނެކަމަށްވެސް ސަރުކާރުން ވަނީ އިޢުލާނުކޮށްފައެވެ.