ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އިން އޭޝިއާ ކޯޕަރޭޓް އެކްސެލެންސް އެންޑް ސަސްޓެއިނެބިލިޓީ އެވޯޑްސް 2024 ގެ “އިންޑަސްޓްރީ ޗެމްޕިއަންސް އޮފް ދަ އިޔަރ” އެވޯޑް ކާމިޔާބުކޮށްފިއެވެ. މި އެވޯޑު ހަފްލާ ބޭއްވުނީ މި މަހުގެ 14 އަދި 15 ވަނަ ދުވަހު ތައިލެންޑުގެ ވެރިރަށް ބެންކޮކުގައެވެ.
މިއީ އޭޝިއާ ކޯޕަރޭޓް އެކްސެލެންސް އެންޑް ސަސްޓެއިނަބިލިޓީ އެވޯޑްސް (އޭސީއީއެސް) ގެ 11 ވަނަ އެވޯޑު ހަފްލާއެވެ. މި އެވޯޑަކީ 2014 އިން ފެށިގެން ކޮންމެ އަހަރަކު ދެމުންދާ އެވޯޑެކެވެ.
މީގެ އިތުރުން، މި ހަފްލާގައި “އަހަރުގެ އެންމެ އިންސްޕަޔަރިން އިސްވެރިޔާ” ގެ އެވޯޑް ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ އަށް ވަނީ ލިބިވަޑައިގެންފައެވެ.
ސްޓެލްކޯއަކީ ދިވެހިރާއްޖޭގެ ކަރަންޓުގެ ޚިދުމަތް ފޯރުކޮށްދިނުމުގައި އެންމެ އިސް ދައުރެއް އަދާކުރާ ކުންފުންޏެވެ. ހުސެއިން ފަހުމީގެ ލީޑަރޝިޕްގެ ދަށުން، ސްޓެލްކޯއިން ވަނީ ގިނަގުނަ ކުރިއެރުންތަކެއް ހޯދާފައެވެ. ފަހުމީ ވަނީ ކުންފުނީގެ އުފެއްދުމުގެ އަސާސްތަކަށް ފުރިހަމައަށް ބޯލަނބައި، ވިޔަފާރީގެ އުފެއްދުންތެރިކަމާއި، އޮޕަރޭޝަނަލް އެފިޝިއެންސީ އަދި ދެމެހެއްޓެނިވި ކުރިއެރުމުގެ މަތީ ފަންތިއަށް ކުންފުނި ގެންގޮސްދިނުމުގައި ހަރުދަނާ ދައުރެއް އަދާކުރައްވާފައެވެ.
ފަހުމީގެ ލީޑަޝިޕްގައި ކުންފުނި ކުރިއެރުވުމަށް އެއްބާރުލުމާއި، ހާމަކަން ބޮޑު ގޮތެއްގައި ކަންކަން ކުރުމުގެ އަސާސްތައް ދަމަހައްޓައެވެ. އަދި ތަފާތު ނަޒަރިއްޔާތުތައް ކުރިއަރާފައިވާ އިންކްލޫސިވް މާހައުލެއް އުފައްދައި، މުވައްޒަފުން ކުންފުނީގެ ސްޓްރެޓެޖިކް އަމާޒުތަކާ އެއްގޮތްވާކަން ކަށަވަރުކޮށްދިނުމަށްވެސް ފަހުމީ އިސްކަން ދެއްވައެވެ.
މީގެ އިތުރުން، ފަހުމީގެ ލީޑަރޝިޕްގެ ދަށުން ވަނީ މުވައްޒަފުންގެ ގުޅުން އިތުރުކޮށް، ޕްރޮފެޝަނަލް ޑިވެލޮޕްމަންޓްގެ ފުރުސަތުތައް ފަހިކޮށްދީ، މެދުނުކެނޑި އުނގެނުމުގެ ސަގާފަތެއް އެ ކުންފުނީގައި ބިނާކޮށްފައެވެ.
މި އެވޯޑު ލިބުމަކީ ސްޓެލްކޯގެ ކާމިޔާބީތަކާއި ހުސެއިން ފަހުމީގެ ލީޑަރޝިޕްގެ ފެންވަރު ބައިނަލްއަޤްވާމީ ފެންވަރުގައި ފާހަގަކުރެވިގެން ދިޔަ ކަމެކެވެ.