ގޭންގު ކުށްތައް ހުއްޓުވުމަށްޓަކައި ސަރުކާރުން ގިނަގުނަ މަސައްކަތްތަކެއް ކުރަމުންދާކަން ދާޚިލީ ސަލާމަތާއި ފަންނިއްޔަތާބެހޭ ވުޒާރާއިން އާންމުކުރި ތަފާސް ހިސާބުތަކުން ދައްކައިފިއެވެ. މި ރިޕޯޓުގައިވާ ގޮތުން، 2023 ވަނަ އަހަރުގެ ޖެނުއަރީ މަހުން ފެށިގެން ނޮވެމްބަރު މަހާ ހަމައަށް ގޭންގު ކުށްތައް ހުއްޓުވުމަށް ކުރެވުނު މަސައްކަތްތައް ވަނީ ފާހަގަކުރެވޭ މިންވަރަކަށް އިތުރުވެފައެވެ.
މި މުއްދަތުގައި ގޭންގު ކުށްތަކާ ގުޅިގެން ހުއްޓުވައި ސުވާލުކުރެވުނު މީހުންގެ އަދަދު 5,407 އިން 20,597 އަށް އިތުރުވެފައިވާއިރު، ކުޑަކުދިންނާ ސުވާލުކުރެވުނު އަދަދު 341 އިން 2,315 އަށް އިތުރުވެފައިވެއެވެ. މީގެއިތުރުން، ސަރަހައްދުތައް ޗެކްކުރި އަދަދު 17,314 އިން 106,174 އަށް އަދި ފާސްކުރެވުނު އުޅަނދުފަހަރުގެ އަދަދު 42 އިން 3,043 އަށް އިތުރުވެފައިވެއެވެ.
ހަމައެހެންމެ، މި މުއްދަތުގައި ހައްޔަރުކުރެވުނު މީހުންގެ އަދަދު 44 އިން 105 އަށް އިތުރުވެފައިވާއިރު، މިހާރު ހައްޔަރުގައި ތިބި މީހުންގެ އަދަދު 10 އިން 50 އަށް އަދި ދަޢުވާ ކުރެވުނު މީހުންގެ އަދަދު 35 އިން 65 އަށް އިތުރުވެފައިވާކަން ފާހަގަކޮށްފައިވެއެވެ.
ގޭންގު ކުށްތައް ހުއްޓުވުމަށް އިތުރު ފިޔަވަޅުތަކެއްގެ ގޮތުގައި، ފުލުހުން ވަނީ ގޭންގު ކުށްތަކަށް ޚާއްޞަ ވިންގެއް އުފައްދާފައެވެ. އަދި ގޭންގު ކުށްތައް ހުއްޓުވުމަށް އައު ބިލެއް ފަރުމާކުރުމުގެ މަސައްކަތް ކުރިއަށްދާކަން ފާހަގަކޮށްފައިވެއެވެ. މިއާއެކު، ނުރައްކާތެރިކޮށް ދުއްވާ ވެހިކަލްތަކާއި ގޭންގު މެންބަރުން ދެނެގަނެ، އެފަދަ ވެހިކަލްތައް ޓޯކުރުމުގެ މަސައްކަތްވެސް ކުރިއަށްދާކަމަށް ބުނެފައިވެއެވެ.
އިތުރު ފިޔަވަޅެއްގެ ގޮތުން، ގޭންގުތަކާ ގުޅުންހުރި ކުޑަކުދިންގެ ލިސްޓެއް ހަދައި، އެ ކުދިން ކުށުގެ ވެށިން ދުރުކުރުމަށް ފިޔަވަޅު އަޅަމުންދާކަމަށާއި، މާލެ އާއި ހުޅުމާލޭގައި ގޭންގުތައް އުޅޭ ހޮޓްސްޕޮޓްތައް މެޕްކޮށް، 24 ގަޑިއިރު ޕެޓްރޯލްކޮށް ބަލަހައްޓަމުންދާކަމަށްވެސް މަޢުލޫމާތު ދީފައިވެއެވެ.
މި ހުރިހާ މަސައްކަތްތަކަކީ ގޭންގު ކުށްތައް މަދުކޮށް، މުޖުތަމަޢުގެ ރައްކާތެރިކަން އިތުރުކުރުމަށް ކުރެވޭ މަސައްކަތްތަކެއްކަން ފާހަގަކޮށްފައިވެއެވެ.