އޮމަދޫގެ މަގުތަކުތަކުން ފެން ހިންދުމަށްޓަކައި، ޖަންކްޝަން ހެދުމަށް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ)ގެ މުވައްޒަފުން މިއަދު ނުކުމެއްޖެއެވެ. މި މަސައްކަތަކީ މިހާރު ކުރަމުންދާ ވިއްސާރައިގެ ސަބަބުން އޮމަދޫގެ މަގުތަކުގައި ޖަމާވެފައިވާ ފެން ހިންދުމަށްޓަކައި ކުރެވޭ މަސައްކަތެކެވެ.
ސްޓެލްކޯގެ އެމްޑީ ހުސެއިން ފަހުމީ “އެކްސް” ގައި ކުރެއްވި ޕޯސްޓެއްގައި ވިދާޅުވެފައިވަނީ މި މަސައްކަތަކީ ޤައުމަށް އަދި ރައްޔިތުންނަށް ޚިދުމަތް ކުރުމުގެ ރޫހުގައި ކުރެވޭ މަސައްކަތެއް ކަމަށެވެ. އަދި ސްޓެލްކޯގެ މުވައްޒަފުންނަކީ ޤައުމީ ލޯބި އޮތް، އަދި ޤައުމަށް ޚިދުމަތް ކުރުމަށް ތައްޔާރަށް ތިބޭ ބައެއްކަން ފާހަގަކުރެއްވިއެވެ.
“ފެންބޮޑުވުމާއި، ޤުދުރަތީ ކާރިސާތަކާއި، އަދި އެހެނިހެން ގޮންޖެހުންތަކުގައި ސްޓެލްކޯގެ މުވައްޒަފުން ދައްކުވައިދެނީ ކެތްތެރިކަމާއި، އޯގާތެރިކަމާއި، އަދި ޒިންމާދާރުކަމެވެ. ދަތި ވަގުތުތަކުގައި ކުރިއަށް ނުކުމެ، ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް ކުރާ މަސައްކަތަކީ ތިޔަ ބޭފުޅުންގެ އިޚްލާޞްތެރިކަމާއި ޕްރޮފެޝަނަލިޒަމްގެ ހެއްކެއް.” ފަހުމީ ވިދާޅުވިއެވެ.
ސްޓެލްކޯގެ މިޝަނަކީ ހަމައެކަނި ހަކަތަ ފޯރުކޮށްދިނުމެއް ނޫން ކަމަށާއި، އެންމެ ބޭނުންވާ ވަގުތުތަކުގައި ޤައުމަށް ބުރަދަނަކަށްވުން ކަމަށް ފަހުމީ ފާހަގަކުރެއްވިއެވެ. އަދި ސްޓެލްކޯގެ ކޮންމެ މުވައްޒަފެއްގެ މަސައްކަތާއި އިޚްލާޞްތެރި ޚިދުމަތް ފާހަގަކުރެވޭ ކަމަށާއި، އެ މުވައްޒަފުންގެ ޚިދުމަތަށް ވަރަށް ބޮޑަށް ޝުކުރުވެރިވާ ކަމަށް ވިދާޅުވިއެވެ.