އިދިކޮޅު އެމްޑީޕީއިން ރައްޔިތުންނަށް ހަގީގަތް އޮޅޭގޮތަށް މައުލޫމާތު ފެތުރުން ވެރިކަންކުރާ ޕާޓީ ޕީޕަލްސް ނެޝަނަލް ކޮންގްރެސް (ޕީއެންސީ) އިން ހަރުކަށި އިބާރާތުން ކުށްވެރިކޮށްފި އެވެ. ޕީއެންސީން މިއަދު ނެރުނު ބަޔާނެއްގައި ވަނީ އެމްޑީޕީން މަސައްކަތްކުރަނީ ރައްޔިތުންނަށް ސާފުކޮށް ފެންނަން ހުރި ކަންކަންވެސް އޮޅުވާލަން ކަމަށް ބުނެފއެެވެ.
ޕީއެންސީން ނެރުނު ބަޔާނެއްގައި ބުނެފައިވަނީ ސަރުކާރުން އެޅި ފިޔަވަޅުތަކުގެ ސަބަބުން، އަހަރުން އަހަރަށް ބޮޑުވަމުން އައި ޚަރަދުތައް ކޮންޓްރޯލްކުރެވިފައިވާ ކަމަށެވެ. މިގޮތުން ފާއިތުވި 3 އަހަރު އެވަރެޖްކޮށް ކޮންމެ އަހަރަކު 15% އިން ދައުލަތުގެ ޚަރަދުތައް އިތުރުވަމުންދިޔަ ނަމަވެސް، މިއަހަރު އެ އަދަދު 2.5% އަށް ދަށްކުރެވިފައިވާ ކަމަށް ޕީއެންސީން ބުނެފައިވެއެވެ.
އަދި ބަޖެޓު ޑެފިސިޓް ކޮންޓްރޯލްކުރެވި، މިއަހަރު ޖުމްލަ ބަޖެޓުގެ ޑެފިސިޓް 378 މިލިއަން ރުފިޔާއިން ކުޑަކުރެވި، 3.6% ދަށްވެފައިވާކަމަށްވެސް ޕީއެންސީން ފާހަގަކޮށްފައިވެއެވެ.
ޕީއެންސީން އިތުރަށް ބުނެފައިވަނީ މަޢުލޫމާތު ހޯދުމާއި ލިބިގަތުމުގެ ޙައްޤުގެ ދަށުން ހުށަހެޅޭ ހުށަހެޅުންތަކަށް ސަރުކާރުން އިހުމާލުވެފައިވާކަމަށް އެމްޑީޕީން ބުނާ ބުނުމަކީ ޙަޤީޤަތާ ޚިލާފު ވާހަކަތަކެއްކަމަށެވެ. އަދި ރައީސުލްޖުމްހޫރިއްޔާގެ އޮފީހަށް ހުށަހެޅުނު ހުރިހާ އާރްޓީއައި ހުށަހެޅުންތަކަށް ޖަވާބުދީފައިވާކަމަށާއި، ސަރުކާރުގެ ވުޒާރާތަކާއި ދައުލަތުގެ ކުންފުނިތަކުންވެސް އަންނަނީ މިފަދަ ހުށަހެޅުންތަކަށް ޖަވާބުދެމުންކަމަށް ޕީއެންސީން ބުނެފައިވެއެވެ.
މީގެއިތުރުން، ފުރަތަމަ ފަހަރަށް ކެބިނެޓްގެ ނިންމުންތައް އާންމުންނަށް ފެންނާނެހެން ޝާއިޢުކުރަން ފަށާފައިވަނީ މިހާރުގެ ސަރުކާރުންކަމަށްވެސް ޕީއެންސީން ފާހަގަކޮށްފައިވެއެވެ.
ޕީއެންސީގެ ބަޔާނުގައި ނިންމާލަމުން ބުނެފައިވަނީ ރައްޔިތުންނަށް ފެންނަން ހުރި ސާފު ޙަޤީޤަތްތައް އޮޅޭގޮތަށް ދައުލަތުގެ ބަޖެޓުން ފައިސާދީގެން ހިންގާ ސިޔާސީ ޕާޓީތަކުން މަޢުލޫމާތު ފެތުރުމަކީ ބަލައިގަނެވޭނެ ކަމެއް ނޫންކަމަށެވެ.