ރާއްޖޭގައި ބޭރުގެ ސިފައިން ބޭތިއްބުމަށް ރައްޔިތުންގެ މަޖިލީހުގެ ހުއްދަ ހޯދަންޖެހޭ ގޮތަށް ޤާނޫނުއަސާސީއަށް އިޞްލާޙު ގެނައުމުގެ ބިލު މިއަދު މުޅި މަޖިލީހުގެ ކޮމިޓީން ފާސްކޮށްފިއެވެ. މި ބިލު މަޖިލީހަށް ހުށަހެޅުއްވީ ހުޅުދޫ ދާއިރާގެ މެންބަރު މުޙައްމަދު ޝާހިދެވެ.
މިއަދުގެ ޖަލްސާގައި މި ބިލުގެ އިބްތިދާއީ ބަހުސްގައި 13 މެންބަރުން ބައިވެރިވެވަޑައިގެންނެވިއެވެ. އޭގެ ތެރޭގައި އިދިކޮޅު އެމްޑީޕީގެ 7 މެންބަރުންނާއި، ޕީއެންސީގެ 5 މެންބަރުންނާއި، އަދި އަމިއްލަ އެއް މެންބަރު ހިމެނެއެވެ.
ބިލުގެ މުހިންމު އިޞްލާޙުތަކުގެ ތެރޭގައި، ޤާނޫނުއަސާސީގެ 251 ވަނަ މާއްދާގެ (ނ) އަށް ހުށަހެޅުނު އިޞްލާޙު ހިމެނެއެވެ. މި އިޞްލާޙުގައި ބަޔާންކޮށްފައިވަނީ، އެއްބަސްވުމެއްގެ ދަށުން ބާއްވާ އަސްކަރީ ތަމްރީނުތަކުގައި ބައިވެރިވުން ފިޔަވައި، މަޖިލީހުގެ ޖުމްލަ މެންބަރުންގެ އަޣުލަބިއްޔަތުން ފާސްވެގެން މެނުވީ އަސްކަރީ ބޭނުމަކަށް ރާއްޖޭގެ ސަރަހައްދުގައި ބޭރުގެ ސިފައިން އެއްވެސް ސިފައެއްގައި ޢަމަލީގޮތުން ހަރަކާތްތެރިވުމަށް ހުއްދަ ދީގެން ނުވާނެ ކަމަށެވެ.
މީގެ އިތުރުން، ޤާނޫނުއަސާސީގެ 3 ވަނަ މާއްދާއަށްވެސް އިޞްލާޙުތަކެއް ހުށަހެޅުނެވެ. މި އިޞްލާޙުތަކުގެ ތެރޭގައި، ރާއްޖޭގެ ކަނޑުގެ ސަރަހައްދުތަކަށް ބަދަލު ގެނައުމަށް މަޖިލީހުގެ ހަތަރުބައިކުޅަ ތިންބައިގެ އަޣުލަބިއްޔަތު ބޭނުންވާނެކަމަށް ބަޔާންކުރާ އިޞްލާޙެއް ހިމެނެއެވެ.
ބިލު ކޮމިޓީން ފާސްކޮށްފައިވަނީ 75 މެންބަރުންގެ ވޯޓުންނެވެ. 13 މެންބަރުން ވޯޓުދެއްވާފައިވަނީ ބިލު ބަލައިނުގަތުމަށެވެ.