ރައްޔިތުންގެ މަޖިލީހުގެ މުޅި މަޖިލީސް ކޮމިޓީން މިއަދު ޤާނޫނު އަސާސީއަށް އިޞްލާޙު ގެނައުމަށް ހުށަހެޅުނު ބިލު ފާސްކޮށްފިއެވެ. މި ބިލުގެ ދަށުން ރައީސުލްޖުމްހޫރިއްޔާއަށް ޤައުމީ ތަރައްޤީގެ ޕްލޭން އެކުލަވާލުމުގެ ބާރު ލިބިދެވޭނެއެވެ.
ހުޅުދޫ ދާއިރާގެ ޕީއެންސީ މެންބަރު މުޙައްމަދު ޝާހިދު ހުށަހެޅުއްވި މި ބިލު ކޮމިޓީން ފާސްކޮށްފައިވަނީ 75 މެންބަރުންގެ ތާއީދާއެކުގައެވެ. އަދި 13 މެންބަރުން ވަނީ ބިލު ބަލައިނުގަތުމަށް ވޯޓު ދެއްވާފައެވެ.
މި ބިލުގެ ދަށުން ރައީސުލްޖުމްހޫރިއްޔާގެ ބާރުތަކުގެ ތެރެއަށް އިތުރުކުރެވޭ ކަންތައްތަކުގެ ތެރޭގައި ކުރު، މެދު އަދި ދުރު ރާސްތާއަށް އަމާޒުކޮށް ޤައުމީ ތަރައްޤީގެ ޕްލޭންތަކާއި ތަޞައްވުރުތައް އެކަށައެޅުން ހިމެނެއެވެ.
މި ބިލު ފާސްވުމާއެކު ސަރުކާރުން ކުރިން ހުށަހަޅާފައިވާ އާބަން ޑިވެލޮޕްމަންޓް ބިލާ ގުޅިގެން ބައެއް ކައުންސިލަރުން ފާޅުކުރަމުންދިޔަ ކަންބޮޑުވުންތަކަށް އިތުރު ބާރެއް ލިބިގެންދާނެ ކަމަށް ބެލެވެއެވެ. އެއީ އާބަން ޑިވެލޮޕްމަންޓް ބިލުގައި ރަށްރަށުގެ ޕްލޭންތައް ސަރުކާރަށް ނިންމޭ ގޮތަށް އޮތުމާ ގުޅިގެންނެވެ.
މި ބިލު މިހާރު ވަނީ މަޖިލީހުގެ ފްލޯއަށް ފޮނުވުމަށް ނިންމާފައެވެ.