ޕާޓީ ބަދަލުކުރުމުން މެމްބަރުން ވަކިވާ ގޮތަށް ގާނޫނުއަސާސީ އަށް މިއަދު ހުށަހެޅި އިސްލާހަށް އެމްއެންޕީ އަދި އެމްޑީއޭއިން ތާއީދުކޮށްފިއެވެ.
މި އިސްލާހު މަޖިލީހުން މިއަދު ފާސްކޮށްފައިވަނީ 78 މެންބަރުންގެ ތާއީދާ އެކުގައެވެ. އޭގެތެރޭގައި އެމްއެންޕީ އަދި އެމްޑީއޭ އަދި މިނިވަން މެމްބަރުން ވެސް ހިމެނެއެވެ.
ޕީއެންސީގެ އިތުރަށް މި ބިލަށް ވޯޓުދިން މެމްބަރުންގެ ތެރޭގައި ހިމެނެނީ އެމްއެންޕީއަށް ނިސްބަތްވާ މާފަންނު އުތުރު ދާއިރާގެ މެމްބަރު މުހައްމަދު ނާޒިމް، އެމްޑީއޭއަށް ނިސްބަތްވާ ވެލިދޫ ދާއިރާގެ މެމްބަރު މުހައްމަދު އައްބާސް އަދި މިނިވަން މެމްބަރެއްގެ ގޮތުގައި ތުޅާދޫ ދާއިރާ ތަމްސީލްކުރައްވަމުން ގެންދަވާ އަބްދުލް ހަންނާން އަބޫބަކުރެވެ.
މި ބިލަކީ މަޖިލިސް މެންބަރުންގެ ޖުމްލަ އަދަދުގެ ހަތަރުބައިކުޅަ ތިންބައި މެންބަރުންގެ އަގުލަބިއްޔަތުން ފާސްވާ ބިލަކަށްވުމާ އެކު، ރިޔާސަތަށް ވޯޓުގައި ބައިވެރިވެވޭނެކަން މަޖިލިސް ރައީސް އަބްދުއްރަހީމް ވަނީ އިއުލާން ކުރައްވައިފައެވެ.
މި ބިލު ފާސް ނުކުރުމަށް 13 މެންބަރުން ވޯޓު ދެއްވިއެވެ. އެއީ ހުސް އެމްޑީޕީ މެންބަރުންނެވެ.
އެ ބިލު ސަރުކާރުގެ ފަރާތުން ރައްޔިތުންގެ މަޖިލީހުގެ މިއަދުގެ ޖަލްސާއަށް ހުށަހެޅުއްވީ، ހުޅުދޫ ދާއިރާގެ މެންބަރު މުހައްމަދު ޝާހިދެވެ. އެ ބިލުގައި މައިގަނޑު ތިން ކަމެއް ގާނޫނުއަސާސީގައި ހިމަނަން މިއަދު ހުށަހަޅުއްވާފަވެއެވެ. އެއީ:
- މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ނުވަތަ އެހެން ޕާޓީއަކަށް ގުޅުމުން ވަގުތުން ގޮނޑި ގެއްލޭ ގޮތް ހެދުން
ރާއްޖޭގެ ސަރަހައްދުން ބައެއް ދޫކޮށްލެވޭނީ ރައްޔިތުންގެ މަޖިލީހުން ފާސްކޮށްގެން ކަމަށް ހެދުން - ރާއްޖޭގައި ބޭރު ގައުމެއްގެ އެއްވެސް އަސްކަރީ ބަޔަކަށް ތިބެވޭނީ މަޖިލީހުން ފާސްކޮށްގެން ކަމަށް ހެދުން
- ގާނޫނުއަސާސީއަށް އިޞްލާޙެއް ގެނެވޭނީ ރައްޔިތުންގެ މަޖިލީހުގެ ޖުމްލަ މެންބަރުންގެ ހަތަރުބައިކުޅަ ތިންބައިގެ އަޣުލަބިއްޔަތުން ފާސްކުރާ ޤާނޫނަކުންނެވެ. އެއީ، 70 މެންބަރުންނެވެ.
ބިލުގެ މަސައްކަތް މިއަދު ފަށައި މިއަދު ފާސް ކުރުމުގެ މަސައްކަތް ކުރާތީ އިދިކޮޅު އެމްޑީޕީގެ ސަޕޯޓަރުން ވަނީ މަޖިލިސް ދޮރުމަތީގައި އިހުތިޖާޖު ކޮށްފަ އެވެ. ހަމަ އެވަގުތު ޕީއެންސީގެ ސަޕޯޓަރުން ވެސް މަޖިލިސް ކައިރިއަށް އެއްވި އެވެ.