ރައްޔިތުންގެ މަޖިލީހުން ފާސްކޮށް، ރައީސް ތަޞްދީޤުކުރެއްވި ޤާނޫނުއަސާސީގެ އިޞްލާޙުތަކަކީ ދިވެހިރާއްޖޭގެ މިނިވަންކަމާއި، ސިޔާދަތާއި، ތަރައްޤީ އަދި ހަމަޖެހުމަށްޓަކައި ނިންމެވި ވަރަށް މުހިންމު ނިންމެވުންތަކެއްކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
މި އިޞްލާޙުތަކުގެ ތެރޭގައި މަޖިލިސް މެންބަރުންގެ ގޮނޑި ގެއްލޭނެ ޙާލަތްތައް، ބޭރުގެ ސިފައިންނަށް ރާއްޖޭގައި ތިބުމުގެ ހުއްދަ ދިނުމާއި، އަދި ރާއްޖޭގެ ޚާއްޞަ އިޤްތިޞާދީ ސަރަޙައްދަށް އުނިކަމެއް އަންނަ ކަންކަން ނިންމުމުގައި ރައްޔިތުންގެ ޚިޔާލު ހޯދުން ހިމެނެއެވެ.
ރައީސް މުޢިއްޒު ވިދާޅުވި ގޮތުގައި މި އިޞްލާޙުތަކާއެކު ރާއްޖޭގެ ކަނޑުގެ ސަރަޙައްދު އެކްސްކްލޫސިވް އިކޮނޮމިކް ޒޯން (އީއީޒެޑް) އާ ހަމައަށް ކަނޑައެޅޭނެއެވެ. އަދި މި ސަރަޙައްދަށް ބަދަލު ގެނެވޭނީ މަޖިލީހުގެ ހަތަރުބައިކުޅަ ތިންބައިގެ އަޣުލަބިއްޔަތުން ފާސްވެ، ރައްޔިތުންގެ ވޯޓަކުން ފާސްވުމުންނެވެ.
މީގެ އިތުރުން، “އެންޓި ޑިފެކްޝަން” ޤާނޫނުއަސާސީގައި ހިމެނުމަކީ ޤައުމުގެ ހަމަޖެހުން ޤާއިމުކުރުމަށް ނިންމި މުހިންމު ނިންމުމެއްކަމަށް ރައީސް ފާހަގަކުރެއްވިއެވެ. އަދި ރާއްޖޭގެ ތަރައްޤީއަށް ކުރު، މެދު އަދި ދުރު ރާސްތާގެ ޕްލޭންތައް އެކުލަވާލުމަކީ ރައީސުލްޖުމްހޫރިއްޔާގެ މަސްއޫލިއްޔަތުގެ ތެރޭގައި ހިމެނޭ ކަމެއްގެ ގޮތުގައި މިހާރު ކަނޑައަޅާފައިވާކަންވެސް ފާހަގަކުރެއްވިއެވެ.
މި އިޞްލާޙުތަކަކީ ރާއްޖޭގެ ރައްޔިތުންގެ ޙައްޤުގައި، ޤައުމީ ރޫޙުގައި ނިންމާފައިވާ މުހިންމު ނިންމުންތަކެއްކަމަށް ރައީސް މުޢިއްޒު ވިދާޅުވެފައިވެއެވެ.