2028 ގައި ބާއްވާ ރިޔާސީ އިންތިހާބުގައި ޕީއެންސީން ވާދަކުރައްވާނެ ކެންޑިޑޭޓަކު ކަނޑައަޅަަން ޕްރައިމަރީއެއް ނުބާއްވާނެ ކަމަށާއި އެ އަހަރު ވެސް އެ ޕާޓީގެ ރިޔާސީ ކެންޑިޑޭޓަކަށް ވާނީ މިހާރުގެ ރައީސް ޑރ. މުހައްމަދު މުއިއްޒު ކަމަށް ޗެއާޕާސަން އަބްދުއްރަހީމް ވިދާޅުވެއްޖެ އެވެ.
އަބްދުއްރަހީމް އެކަން ހާމަކުރެއްވި އިއްޔެ ކުރިއަށް ދިޔަ ޕީއެންސީގެ އެތެރޭގެ އިންތިހާބަށް ފަހު އެ ޕާޓީގެ އޮފީހުގައި ބޭއްވި ޕްރެސްބްރީފިންއެއްގަ އެވެ.
އަބްދުއްރަހީމް ވިދާޅުވީ ޕީއެންސީގެ އަސާސީ ގަވާއިދުގައިވާ ގޮތުން ހިނގަމުން އަންނަ ވެރިކަމުގައި އެ ޕާޓީގެ މެމްބަރަކު ރައީސްގެ މަގާމުގައި ހުންނެވި ނަމަ އެ ބޭފުޅަކަށް ޕްރައިމަރީއަކާ ނުލައި ދެވަނަ ދައުރަކަށް ލިބިވަޑައިގަންނަވާނެ ކަމަށެވެ. އެހެންވެ، މިއީ ޕްރައިމަރީ ބާއްވަން ޖެހޭ ހާލަތެއް ނޫން ކަމަށް ވެސް އަބްދުއްރަހީމް ވިދާޅުވިއެވެ.
އެ އުސޫލުން ބަލާ ނަމަ ޕީއެންސީގެ 2028 ގެ ރިޔާސީ ޓިކެޓު ލިބިވަޑައިގަންނަވާނީ ރައީސް މުއިއްޒަށް ކަމަށް އަބްދުއްރަހީމް ވިދާޅުވި އެވެ.
“ޕީއެންސީގެ އަސާސީ ގަވާއިދުގައި ބުނަނީ ޕީއެންސީގެ ޓިކެޓުގައި ނިކުމެވަޑައިގެން ރާއްޖޭގެ ވެރިކަމަށް ވަޑައިގަންނަވާ ބޭފުޅަކީ އެ މަގާމުގައި ހުންނަ ދެވަނަ ދައުރަކަށް ކުރިމަތިލައްވަން ބޭނުންފުޅުވާންޏާ ރިޔާސީ ޕްްރައިމަރީއަކާ ނުލައި އެ ޓިކެޓް އެ ބޭފުޅަކަށް ލިބިވަޑައިގަންނަވާނެ ކަމަށް، އެހެންވީމަ ޕްރައިމަރީ ބާއްވަން ޖެހޭ ކަމެއް ނޫން” އަބްދުއްރަހީމް ވިދާޅުވި އެވެ.
ދިޔަ އަހަރުގެ ސެޕްޓެމްބަރު މަހު އޭރުގެ ރައީސް އިބްރާހީމް މުޙައްމަދު ޞާލިޙާ ވާދަކުރައްވައި ރިޔާސީ އިންތިޚާބު ކާމިޔާބު ކުރެއްވި ރައީސް މުއިއްޒު، ދެވަނަ ދައުރަކަށް ވާދަކުރައްވާނެ ކަމަށް ރަސްމީ ގޮތެއްގައި އިއުލާން ކުރައްވައިފައިނުވެއެވެ. ނަމަވެސް އެ މަނިކުފާނު ވަނީ ދެވަނަ ދައުރަކަށް ވާދަކުރައްވާނެ ކަމުގެ އިޝާރާތްތައް ކުރައްވައިފައެވެ.