ވެރިކަމަށް ވާދަކުރެއްވުމުގެ އެއްވެސް ވިސްނުމެއް ނުގެންގުޅުއްވާ ކަމަށް ޕީއެންސީގެ ޗެއާޕާސަން އަބްދުއްރަހީމް ވިދާޅުވެއްޖެއެވެ.
ރޭ ޕީއެންސީން ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ރައްޔިތުންގެ މަޖިލީހުގެ ރައީސް އަބްދުއްރަހީމް ވިދާޅުވީ، ރާއްޖޭގެ ވެރިކަމަށް ކުރިމަތިލުމުގެ ވިސްނުންފުޅެއް ނެތް ކަމަށެވެ. އަދި ކުރިއަށް އޮތްތާގައި ވެސް އެފަދަ ވިސްނުމެއް ނުގެންގުޅުއްވާނެ ކަމަށް އަބްދުއްރަހީމް ވިދާޅުވިއެވެ.
“އަޅުގަނޑު ވާދައެއް ނުވެސް ކުރާނަން، ފުރުސަތެއް ލިބުނަސް އަޅުގަނޑު އެކަމުން ސަލާމަތްވާނަން،”އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވި ގޮތުގައި އެމަނިކުފާނު މަސައްކަތް ކުރައްވަނީ ރާއްޖޭގައި ދެވަނަ ދައުރެއް ފުރިހަމަ ކުރައްވާ ފުރަތަމަ ރައީސަކަށް ރައީސް ޑރ. މުއިއްޒު ހެދުމަށެވެ.
އެގޮތުން މިހާރު އަމަލުކުރަމުން އަންނަ ގާނޫނު އަސާސީގެ ދަށުން ދެވަނަ ދައުރެއް ކާމިޔާބު ކުރައްވާ ފުރަތަމަ ރައީސްގެ ގޮތުގައި 2028 ވަނަ އަހަރު ރައީސް އިންތިޚާބު ކުރުމުގައި ސާބިތުވެ ހުންނަވާނެ ކަމަށް ރޭ ވެސް އަބްދުއްރަހީމް ވިދާޅުވިއެވެ.