އިލެކްޝަންސް ކޮމިޝަނުގެ ރައީސް ފުވާދު ތައުފީޤު މިއަދު އެ މަޤާމުން ވަކިވެވަޑައިގެންފިއެވެ. އިއްޔެއަކީ ކޮމިޝަނުގެ މެންބަރުކަމުގެ ދެވަނަ ދައުރަކަށް ފުވާދު އައްޔަންކުރެވުނުތާ 5 އަހަރު ފުރޭ ދުވަހެވެ.
ފުވާދު ތައުފީޤަކީ އިލެކްޝަންސް ކޮމިޝަން އުފެދުނު ފަހުން އެތަނުގައި މަސައްކަތްކުރެއްވި އިސް ބޭފުޅެކެވެ. އޭނާ ވަނީ ބޯހިމެނުމާއި ވޯޓުލުމާ ބެހޭގޮތުން ދިވެހިންގެ މެދުގައި ހޭލުންތެރިކަން އިތުރުކުރުމަށް ގިނަ މަސައްކަތްތަކެއް ކުރައްވާފައެވެ.
ފުވާދު އެންމެ ފުރަތަމަ އިލެކްޝަންސް ކޮމިޝަނާ ގުޅިވަޑައިގަތީ 2008 ވަނަ އަހަރުއެވެ. އޭގެފަހުން 2009 ވަނަ އަހަރު ކޮމިޝަނުގެ ރައީސްކަމަށް އޭނާ އައްޔަންކުރެވުނެވެ. 2014 ވަނ ވަނަ އަހަރު ކޮމިޝަނުން ވަކިވުމަށްފަހު، 2019 ގައި އަލުން ކޮމިޝަނާ ގުޅިވަޑައިގަތެވެ. އަދި 2021 ވަނަ އަހަރު ދެވަނަ ފަހަރަށް ކޮމިޝަނުގެ ރައީސްކަމުގެ މަޤާމަށް އައްޔަންކުރެވުނެވެ.
ފުވާދުގެ މި ދައުރުގައި ކުރިއަށްދިޔަ 2023 ވަނަ އަހަރުގެ ރިޔާސީ އިންތިޚާބާއި 2024 ވަނަ އަހަރުގެ މަޖިލިސް އިންތިޚާބު ފާހަގަކޮށްލެވެނީ މިހާތަނަށް ރާއްޖޭގައި އެންމެ އަމާންކަމާއި ސުލްޙަވެރިކަމާއެކު ބޭއްވުނު ދެ އިންތިޚާބުގެ ގޮތުގައެވެ.
ކޮމިޝަނުން ވަކިވެވަޑައިގަންނަވަމުން ފުވާދު ވަނީ ކޮންމެ ދިވެހި ރައްޔިތަކުވެސް ވޯޓުލުމުގެ ޙައްޤު އަދާކުރުމަށާއި، އިންތިޚާބުތަކާއި ބޯހިމެނުމުގެ މަސައްކަތްތަކަށް އެއްބާރުލުން ދިނުމަށް އިލްތިމާސްކުރައްވާފައެވެ.
ފުވާދު ތައުފީޤަކީ ޤައުމީ ޚިދުމަތްތެރިއެއްގެ ގޮތުގައި ގިނަ ބަޔަކު ބަލައިގަންނަ ބޭފުޅެކެވެ. ޤައުމުގެ މަސްލަހަތު އިސްކޮށްގެން ވަކި ފަރާތަކަށް ޖެހިވަޑައިނުގަނެ މަސައްކަތްކުރެއްވި ބޭފުޅެއްގެ ގޮތުގައި އޭނާ ފާހަގަކުރެވެއެވެ.