އިސްލާމީ ފަތުވާދޭ އެންމެ މަތީ މަޖިލީހާއި، އިސްލާމީ ކަންތައްތަކާ ބެހޭ ވުޒާރާ ގުޅިގެން ދިވެހިރާއްޖޭގެ ދީނީ ޢިލްމުވެރިންނާއި އިމާމުންނަށް އަމާޒުކޮށްގެން ބާއްވާ ‘ފަތުވާ މަހާސިންތާ’ ފަށައިފިއެވެ. މިއީ ރާއްޖޭގައި މިހާތަނަށް ބާއްވާ މި ފަދަ ފުރަތަމަ މަހާސިންތާކަން ފާހަގަކޮށްލެވެއެވެ.
މި މަހާސިންތާގެ މައުޟޫއަކީ “މުޖުތަމަޢު އިސްލާޙުކުރުމުގައި ފަތުވާގެ ދައުރު”އެވެ. މި މަހާސިންތާގެ މަގުސަދަކީ ދިވެހިރާއްޖޭގައި ދީނީ އެއްބައިވަންތަކަން ޙިމާޔަތްކުރުމާއި އިސްލާމްދީނުގެ މަތިވެރިވި ދަންމަރު ފެތުރުމަށް މަސައްކަތްކުރައްވާ ފަރާތްތައް އެއް ތަނަކުން ބައްދަލުވެ މަޝްވަރާކޮށް ޚިޔާލު ބަދަލުކުރުމުގެ ފުރުސަތު ހޯދައިދިނުމެވެ. އަދި ދިވެހިރާއްޖޭގައި ދީނީ ގޮތުން ޚިޔާލު ތަފާތުވާ މައްސަލަތައް ދެނެގަތުމާއި، މުޖުތަމަޢުގެ މަސްލަޙަތު ހިމެނޭ ދީނުގެ އެކިއެކި މައްސަލަތަކުގައި ޚިޔާލު ހޯދައި މަޝްވަރާކުރުމާއި، މި ކަންކަމުގައި ގުޅުން ހުރި ފަރާތްތައް އެކުގައި މަސައްކަތްކޮށް މުޖުތަމަޢު އިޞްލާޙުކުރުމުގައި ރޭވުންތެރިކަމާ އެކު، ރަނގަޅު ނަތީޖާތަކެއް ނެރެވޭނެ ގޮތްތައް ދެނެގަތުމެވެ.
މަހާސިންތާ ފެށުމުގެ ގޮތުން ބޭއްވި ރަސްމިއްޔާތުގައި ވާހަކަފުޅުދައްކަވަމުން އިސްލާމީ ކަންތައްތަކާ ބެހޭ ވަޒީރު، ޑރ. މުޙައްމަދު ޝަހީމް ޢަލީ ސަޢީދު ވިދާޅުވީ ،އިސްލާމީ ފިޤުހުގައި ފަތުވާގެ މަޤާމަކީ ވަރަށް މަތިވެރި މަޤާމެއްކަމަށާއި ވަކި ކަމެއްގެ ޝަރުޢީ ޙުކުމެއް ބަޔާންކުރުމުގެ ކުރީން އެ ކަމެއްގެ ޙަޤީޤަތް ތަޞައްވުރުކުރުމަކީ ޝަރުޢީ ޤަވާޢިދެއްކަމުގައެވެ.
މީގެ އިތުރަށް ވަޒީރު ވިދާޅުވީ މި ޒަމާނުގައި، ކުރިމަތިވެފައިވާ ޒަމާނީ ފިޤުހީ މައްސަލަތަކުގައި ޙުކުމްތައް ބަޔާންކުރުމުގައި ޖަމާޢީ ގޮތުން މަޝްވަރާކުރެވެން ޖެހޭކަމަށާއި އެ ފަދަ ކަންކަމުގައި ފަރުދީ ގޮތުން ފަތުވާދީ ހެދުމަކީ އިސްލާމީ މުޖުތަމަޢު ބައިބައިވެގެން ހިނގައިދާނެ ކަމެއްކަމުގައެވެ.
މީގެ އިތުރަށް ރާއްޖޭގެ ފަތުވާގެ ނިޒާމު ހަރުދަނާކުރުމަކީ ސަރުކާރުގެ ސިޔާސަތެއްކަމަށާއި ދީނީ އެއްބައިވަންތަކަން ޤާއިމުކުރެއްވުމަށް ޓަކައި އިއްޒަތްތެރި ރައީސުލްޖުމުހޫރިއްޔަ ޑރ. މުޙައްމަދު މުއިއްޒު އިސްކަމެއްދެއްވާކަމަށާއި ގިނަ ދުވަސްތަކެއް ވަންދެން ފަތުވާ ކައުންސިލްގެ މެންބަރުން ހަމަނުވެ އޮތް އޮތުން، ރައީސްވަނީ ނިމުމަކަށް ގެންނަވައި، ޤާނޫނުގައި ބަޔާންކޮށްފައިވާ ފުރިހަމަ ޢަދަދަށް މެންބަރުން ޢައްޔަންކުރައްވައިފައިކަމަށް ވެސް ވަޒީރު ވިދާޅުވިއެވެ. ރާއްޖޭގައި ވަޢުޡާއި އިރުޝާދާއި ފަތުވާދިނުން ދަރަޖަކުރުމާ މެދު ޢިލްމުވެރީންގެ މަޝްވަރާ ބޭނުންވާކަމަށާއި އިސްލާމީ ކަންކަން ހިންގުމުގައި އިލްމުވެރީން ދެއްވާ ލަފާފުޅުތަކަށް އަބަދު ވެސް އިޙުތިރާކުރާނެކަމުގެ ޔަޤީންކަން ވަޒީރު ދެއްވިއެވެ.
މި މަހާސިންތާ ކުރިއަށް ގެންދަނީ ޕެނަލް މަޝްވަރާތަކެއް ހިމެނޭހެންނެވެ. މި ޕެނަލް މަޝްވަރާތަކުގައި ދިވެހިރާއްޖޭގައި އެންމެ ފާހަގަކޮށްލެވޭ ދީނީ ޢިލްމުވެރީން ބައިވެރިވެވަޑައިގަންނަވާ ގޮތަށް ވަނީ ހަމަޖެހިފައެވެ.
