ރައްޔިތުންގެ މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީ (241 ކޮމިޓީ) އިން އިޒުރޭލު ޕާސްޕޯޓް މަނާކުރުމާ ގުޅޭ މައްސަލަ އަވަސްކުރުމަށް ނިންމައިފިއެވެ.
މި ބިލު ކުރިން ނިންމުމަށް ފެބްރުއަރީ މަހުގެ ސުންގަޑިއެއް ދީފައިވީ ނަމަވެސް، ކޮމިޓީގެ ފަހުގެ ބައްދަލުވުމުގައި ބިލުގެ މަސައްކަތް އަވަސްކުރުމަށް ނިންމާފައިވެއެވެ. އެގޮތުން ކޮމިޓީގެ މުޤައްރިރު، އޭދަފުށި ދާއިރާގެ މެންބަރު އަޙްމަދު ސަލީމް ވިދާޅުވީ ބިލުގެ މަސައްކަތް އަވަސްކުރުމަށްޓަކައި ސުންގަޑި މާދަމާއަށް ކުރުކުރަން ޖެހޭނެ ކަމަށެވެ.
މި މައްސަލަ އަވަސްކުރުމަށް ހުށަހެޅުއްވީ ކުރެންދޫ ދާއިރާގެ މެންބަރު މުޙައްމަދު ޝާހިދެވެ. މި ހުށަހެޅުމަށް ތާއީދު ކުރެއްވީ ކެލާ ދާއިރާގެ މެންބަރު އަޙްމަދު ޝަރީފެވެ. ކޮމިޓީގައި ހާޒިރުވެ ތިއްބެވި ހުރިހާ މެންބަރުން އިއްތިފާޤުން މި އިޞްލާޙު ވަނީ ފާސްވެފައެވެ.
މި ބިލުގެ މަޤްޞަދަކީ އިމިގްރޭޝަން ޤާނޫނަށް އިޞްލާޙު ގެނެސް، އިޒުރޭލު ޕާސްޕޯޓް ހިފައިގެން ރާއްޖެއަށް އެތެރެވުން މަނާކުރުމެވެ. ކޮމިޓީން މި ބިލާ ގުޅޭގޮތުން ބަންޑާރަ ނައިބު، އިޤްތިޞާދީ ވުޒާރާ، ޓޫރިޒަމް ވުޒާރާ، ޚާރިޖިއްޔާ ވުޒާރާ އަދި މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މާޓީ) ގެ ޚިޔާލު ހޯދާފައިވެއެވެ.