ހުޅުމާލޭގެ ރައުންޑްއެބައުޓްތަކުގައި ބަހައްޓާނެ މޮނިއުމަންޓްތައް ޑިޒައިންކުރުމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބޭއްވި މުބާރާތުގެ ވަނަތައް ހޮވައި، އެއްވަނައަށް ހޮވުނު ފަރާތް އިއުލާންކޮށްފިއެވެ.
މިދިޔަ އަހަރުގެ ސެޕްޓެމްބަރު މަހު އެޗްޑީސީން ހުޅުވާލި މި މުބާރާތަކީ ދިވެހި ވަންތަކަން ދައްކުވައިދޭ މޮނިއުމަންޓްތަކެއް ޑިޒައިންކުރުމަށް ބޭއްވުނު މުބާރާތެކެވެ. މުބާރާތުގައި ބައިވެރިވުމުގެ ފުރުސަތު ހުޅުވާލާފައިވަނީ މިދިޔަ މަހުގެ 30 ވަނަ ދުވަހާ ހަމައަށެވެ.
މުބާރާތުން އެއްވަނައަށް ހޮވިފައިވަނީ ޓީމް އާކޯސްއެވެ. މި ޓީމުގައި ހިމެނެނީ އަބްދުﷲ ޝައިމާން ވަހީދާއި އިބްރާހިމް އިފާޒެވެ. މުބާރާތުން އެއްވަނައަށް ހޮވޭ ފަރާތަށް 100،000 ރުފިޔާގެ އިނާމެއް ދޭނެކަމަށް އެޗްޑީސީން ކުރިން ބުނެފައިވެއެވެ.
އެޗްޑީސީން ހާމަކޮށްފައިވާ ގޮތުގައި ހުޅުމާލޭގެ 11 ރައުންޑްއެބައުޓްގައި މި މޮނިއުމަންޓްތައް ބެހެއްޓުމަށް ވަނީ ނިންމާފައެވެ.
