މިނިވަން މުއައްސަސާތަކުގެ ތެރެއިން އެންޓި-ކޮރަޕްޝަން ކޮމިޝަން (އޭސީސީ) އަދި އިލެކްޝަންސް ކޮމިޝަން (އީސީ)ގެ ރައީސުން އައްޔަންކުރުމުގެ ބާރު ރައީސުލްޖުމްހޫރިއްޔާއަށް ދިނުމަށް ހުށަހެޅުނު ދެ ބިލު މިއަދު ރައްޔިތުންގެ މަޖިލީހުން ފާސްކޮށްފިއެވެ.
މި ދެ ބިލަށް ވޯޓު ދިނުމުގައި 69 މެންބަރުން ވަނީ ތާއީދުކުރައްވާފައެވެ. އަދި ކޮންމެ ބިލަކަށްވެސް 10 މެންބަރުން ވަނީ ދެކޮޅު ހައްދަވާފައެވެ.
މި ބިލުތަކުގެ ދަށުން، އޭސީސީ އަދި އީސީގެ ރައީސާއި ނައިބު ރައީސް އައްޔަންކުރުމަށްޓަކައި، ކޮމިޝަންގެ މެންބަރުންގެ ތެރެއިން މެންބަރެއްގެ ނަން ރައްޔިތުންގެ މަޖިލީހަށް ހުށަހަޅާނީ ރައީސުލްޖުމްހޫރިއްޔާއެވެ. މި ނަން ފާސްކުރުމަށް މަޖިލީހުގެ ޖަލްސާއެއް ބާއްވަންޖެހޭނެއެވެ.
ސަރުކާރަށް ތާއީދުކުރައްވާ މެންބަރުން ވިދާޅުވާ ގޮތުގައި މި ބަދަލު ގެނައުމުން އޭސީސީ އިތުރަށް ޒިންމާދާރުކުރެވި، ކޮރަޕްޝަންގެ މައްސަލަތައް ރަނގަޅަށް ތަޙުޤީޤުކުރެވޭނެއެވެ. ނަމަވެސް، އިދިކޮޅު އެމްޑީޕީން މި އިސްލާޙުތަކާ ދެކޮޅު ހައްދަވައި، މިއީ މިނިވަން މުއައްސަސާތަކަށް ސަރުކާރުން ނުފޫޒު ފޯރުވުމަށް ކުރާ ކަމެއް ކަމަށް ވިދާޅުވެފައިވެއެވެ.
މި ބަދަލާއެކު، މިހާރު އޮތް ގޮތާ ޚިލާފަށް، އޭސީސީ އަދި އީސީގެ ރައީސާއި ނައިބު ރައީސް އައްޔަންކުރުމުގެ ބާރު ކޮމިޝަންގެ މެންބަރުންގެ އަތުން ނެގި، އެ ބާރު ރައީސުލްޖުމްހޫރިއްޔާއަށް ލިބިގެންދާނެއެވެ.