ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ވިނަރެސް ޓަވަރުތަކުން ކާރު ޕާކުކުރާނެ ޖާގަ ދޫކުރުމަށް ހުޅުވާލައިފިއެވެ. މި ފުރުޞަތު ހުޅުވާލާފައިވަނީ އިއްޔެއިން ފެށިގެން ޑިސެމްބަރު 5 ގެ ނިޔަލަށެވެ.
އެޗްޑީސީން ބުނާ ގޮތުގައި ޕާކިންގ ޖާގަ ދޫކުރުމަށް ނިންމާފައިވަނީ ދެ މޮޑެލްއެއްގެ ދަށުންނެވެ. އެގޮތުން، އިމާރާތުގެ ތެރެއިން ކާރު ރަޖިސްޓަރީ ކުރުމުގެ ހުއްދައާއެކު 76 ޖާގައާއި، އިމާރާތުގެ ބޭރުން ހަމައެކަނި ޕާކުކުރުމުގެ ބޭނުމަށް 78 ޖާގަ ދޫކުރުމަށް ވަނީ ނިންމާފައެވެ.
އިމާރާތުގެ ތެރެއިން ދޫކުރާ ޖާގަތައް ވިއްކުމަށް ހަމަޖެހިފައިވަނީ ބީލަމުގެ އުސޫލުންނެވެ. މި ބީލަން ފެށޭ އަގަކީ 650,000 ރުފިޔާއެވެ. މި ޖާގަތަކުގައި ކާރު ރަޖިސްޓަރީ ކުރުމުގެ ހުއްދަ ދެވޭނެއެވެ.
އިމާރާތުގެ ބޭރުން ދޫކުރާ ޖާގަތައް ކުއްޔަށް ދޫކުރުމަށް ހަމަޖެހިފައިވަނީ ފަސް އަހަރުގެ މުއްދަތަށެވެ. މި ޖާގަތަކަށް ބީލަން ފެށޭ އަގަކީ މަހަކު 2,000 ރުފިޔާއެވެ. ނަމަވެސް މި ޖާގަތަކުގައި ކާރު ރަޖިސްޓަރީ ކުރުމުގެ ހުއްދައެއް ނުދެވޭނެއެވެ.
ޕާކިންގ ޖާގަ ދޫކުރެވޭނީ ވިނަރެސް ފްލެޓް ގަތުމުގެ އެއްބަސްވުމުގައި ސޮއިކޮށްފައިވާ މައި-އެޕްލިކަންޓުންނަށެވެ. އަދި ކޮންމެ މީހަކަށްވެސް ދޫކުރެވޭނީ އެންމެ ޖާގައެކެވެ.
މި ފުރުޞަތަށް ކުރިމަތިލާން ބޭނުންވާ ފަރާތްތަކުން އެޗްޑީސީގެ އޮންލައިން ޕޯޓަލް މެދުވެރިކޮށް ހުށަހެޅުމަށް އެ ކޯޕަރޭޝަނުން ވަނީ އެދިފައެވެ.