ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އާ ބެހޭގޮތުން ފެތުރެމުންދާ ތުހުމަތުތަކާ ގުޅިގެން މިނިވަން ތަޙްޤީޤެއް ހިންގުމަށް އެންޓި-ކޮރަޕްޝަން ކޮމިޝަން (އޭސީސީ) ގައި އެދިއްޖެއެވެ.
މި އެދުމުގައި އެންސްޕާއިން ބުނެފައިވަނީ، އެ އިދާރާއާއި އޭގެ މުވައްޒަފުންގެ ނަޒާހަތްތެރިކަމާމެދު ސުވާލު އުފެދޭ ގޮތަށް ދެކެވެމުންދާ ވާހަކަތަކާ ގުޅޭ ފުރިހަމަ ތަޙްޤީޤެއް ހިންގައި، އޭގެ ތަފްސީލު ރައްޔިތުންނަށް ހާމަކޮށްދިނުމަށެވެ.
މި ކަމާ ގުޅިގެން އެންސްޕާއިން ނެރުނު ނޫސްބަޔާނެއްގައި ބުނެފައިވަނީ، އެ އިދާރާ ހިންގުމަށް އިމާރާތެއް ހޯދުމުގެ މުޢާމަލާތަކީ މާލީ ވުޒާރާއާއި އެންސްޕާއާ ދެމެދު، ކަނޑައެޅިފައިވާ ގަވާއިދުތަކާއި އުސޫލުތަކުގެ ތެރެއިން ކުރެވިފައިވާ މުޢާމަލާތެއް ކަމަށެވެ. އަދި މިއީ އެހެން އެއްވެސް ފަރާތަކާ ދެމެދު ކުރެވިފައިވާ މުޢާމަލާތެއް ނޫން ކަމަށް އެންސްޕާއިން ބުނެފައިވެއެވެ.
ސޯޝަލް މީޑިއާގައި ދައުރުވަމުން އަންނަ ލިޔެކިޔުންތަކަށް ހަވާލާދީ، ބައެއް ނޫސްތަކުން ރިޕޯޓުކޮށްފައިވާ ގޮތުގައި، އެންސްޕާއިން “އެމްއެމް” ޓީވީ ހިންގާ ކުންފުންޏާއެކު 34.8 މިލިއަން ރުފިޔާގެ އެއްބަސްވުމެއް ވެފައިވާ ކަމަށް ބުނެފައިވެއެވެ.
ނަމަވެސް، އެންސްޕާއިން މި ވާހަކަތައް ދޮގު ކަމަށް ބުނެ، އެފަދަ ދޮގު މަޢުލޫމާތު ފަތުރާ ފަރާތްތަކާމެދު ފިޔަވަޅު އެޅުމަށް ކަމާބެހޭ މުއައްސަސާތަކަށް ހުށަހަޅާނެ ކަމަށް ބުނެފައިވެއެވެ.