އދ. އަތޮޅުގެ ބައެއް ރަށްތަކަށް އިއްޔެ ފެއްޓެވި ދަތުރުފުޅުގައި ރައީސް ޑރ. މުހައްމަދު މުއިއްޒު އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ (ޑަބްލިޔުޑީސީ) މެންބަރުންނަށް ރޯދަ އެލަވަންސް ލިބޭނެކަން އިއުލާންކުރައްވައިފިއެވެ.
ރޭ އދ. ދަނގެތީގެ ރައްޔިތުންނާ ބައްދަލު ކުރައްވައި ރައީސް ވިދާޅުވީ އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަކީ މިހާތަނަށް ވަރަށް ބޭއިންސާފު ގޮތަކަށް ހަދާފައިވާ ކޮމިޓީތަކެއް ކަމަށާއި، ނަމަވެސް މި ކޮމިޓީތަކަކީ ރަށުގެ ތަރައްގީއަށް މުހިންމު ދައުރެއް އަދާކުރާ ކޮމިޓީތަކެއް ކަމަށެވެ.
އަދި މި ފެށޭ 2025 ވަނަ އަހަރުގެ ރޯދަ މަހުން ފެށިގެން، އެހެން ވަޒީފާތަކުގައި އުޅޭ ފަރާތްތަކާ އެއްގޮތަށް އަންހެނުންގެ ތަރައްގީއަށް މަސައްކަތްކުރާ ކޮމިޓީ މެންބަރުންނަށްވެސް ރޯދަ އިނާޔަތް ލިބޭނެކަމަށް ރައީސް ވިދާޅުވިއެވެ.
“އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަކީ ރަށުގެ ތަރައްގީއަށް ވަރަށް މުހިންމު ދައުރެއް އަދާކުރާ ކޮމިޓީތަކެއް. އެހެންވީމަ ކޮމިޓީ މެންބަރުންގެެންބަރުންގެ ވަރަށް ގިނަ ކަންތައްތަކެއް ހައްލުކޮށްދޭނަމޭ އަޅުގަނޑު ބުނިން ގާނޫނު ހަދާ މަޖިލީހުގެ ތެރެއިން،” ރައީސް ވިދާޅުވިއެވެ.
މީގެ އިތުރުން، އަންނަ އަހަރުގެ ފެބްރުއަރީ މަހު މަޖިލީހުގެ އާ ދައުރު ފެށުމާއެކު، ލާމަރުކަޒީ ގާނޫނަށާއި ވަޒީފާއާބެހޭ ގާނޫނަށް އިސްލާހު ހުށަހަޅުއްވާނެ ކަމަށްވެސް ރައީސް ވިދާޅުވިއެވެ. މި އިސްލާހުތަކުގެ ސަބަބުން އަންހެނުންގެ ތަރައްގީއަށް މަސައްކަތްކުރާ ކޮމިޓީ މެންބަރުންނަށް ލިބޭ ޙައްޤުތައް އިތުރުވެގެންދާނެ ކަމަށް ބެލެވެއެވެ.
މިހާރު އަންހެނުންގެ ތަރައްގީއަށް މަސައްކަތްކުރާ ކޮމިޓީ މެންބަރުންނަށް ކަނޑައަޅާފައި އޮންނަނީ އެލަވަންސެއް އެކަނި ކަމަށާއި، އެއީ ޕާޓް-ޓައިމް ވަޒީފާއެއްގެ ގޮތުގައި ބެލެވޭތީ، ވިހެއުމުގެ ޗުއްޓީ އާއި ރޯދަ މަހުގެ އެލަވަންސް އަދި ބޭންކްތަކުން ލޯނު ނެގުން ފަދަ ފުރުސަތުތައް މި މެންބަރުންނަށް ނުލިބޭކަން ފާހަގަކުރެވެއެވެ. ރައީސްގެ މި އިއުލާނާއެކު، މި ހުރިހާ ކަމެއްގައިވެސް ޑަބްލިޔުޑީސީ މެންބަރުންނަށް ހަމަހަމަކަން ލިބިގެންދާނެ ކަމަށް އުންމީދު ކުރެވެއެވެ.