މި ރަމަޟާން މަހަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން އިއްޔެ ގިނަ އަދަދެއްގެ ކާބޯތަކެތި ކްލިއަރ ކޮށްފިއެވެ. މިގޮތުން 1 މާރޗް 2025 ވަނަ ދުވަހު ކްލިއަރ ކުރެވުނު މުދަލުގެ ތެރޭގައި އެކި ބާވަތުގެ މޭވާއާއި ތަރުކާރީގެ އިތުރުން ބިސް ހިމެނެއެވެ.
އެމްޕީއެލްއިން ހާމަކުރި ތަފާސް ހިސާބުތަކުން ދައްކާ ގޮތުގައި އެންމެ ގިނައިން ކްލިއަރ ކުރެވިފައިވަނީ 570 ޕެކެޖް އަލަނާސިއެވެ. މީގެ އިތުރުން 540 ޕެކެޖް ކަރާއާއި، 416 ޕެކެޖް ދޮންކެޔޮވެސް ވަނީ ކްލިއަރ ކުރެވިފައެވެ. އަދި 399 ޕެކެޖް ބިސްވެސް ވަނީ ކްލިއަރ ކުރެވިފައެވެ.
ކާބޯތަކެތީގެ ތެރޭގައި 144 ޕެކެޖް ޓޮމާޓޯއާއި، 100 ޕެކެޖް އަލުވިއާއި، 100 ޕެކެޖް ފިޔާގެ އިތުރުން އެހެނިހެން ތަރުކާރީގެ ބާވަތްތައްވެސް ހިމެނެއެވެ. މީގެ ތެރޭގައި ބަށި، ކިއުކަމްބާ، ކެބެޖް، މިރުސް، ލޭޑީސް ފިންގާ، އަނބު، އަދި ފަޅޯ ފަދަ ތަކެތި ހިމެނެއެވެ.
އެމްޕީއެލްއިން ކުރިން ހާމަކޮށްފައިވާ ގޮތުގައި ކުރިއަށް އޮތް ރަމަޟާން މަހާ ދިމާކޮށް ރާއްޖޭގެ އެކި ކަންކޮޅުތަކަށް ލޯކަލް ބަނދަރުތަކުން މުދާ ފޮނުވާ ފަރާތްތަކަށް ލުއިފަސޭހަ ޚިދުމަތްތަކެއް ފޯރުކޮށްދިނުމަށް ވަނީ ތައްޔާރުވެފައެވެ. މިކަމަކީ ރަމަޟާން މަހު ރައްޔިތުންނަށް ބޭނުންވާ އަސާސީ ކާބޯތަކެތި ފޯރުކޮށްދިނުމަށް އެޅޭ މުހިންމު ފިޔަވަޅެކެވެ.