މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ އޯކްޝަން ޕޯޓަލް މެދުވެރިކޮށް އައްޑޫ ސިޓީ ހިތަދޫ ޕޯޓުގެ ނީލަންތަކުގައި ބައިވެރިވެވޭނެ ގޮތް ހަމަޖައްސައިފިއެވެ. މި ޚިދުމަތާއެކު އެމްޕީއެލްގެ އޯކްޝަން ޕޯޓަލްއިން ހިތަދޫ ޕޯޓުގެ ނީލަންތައް ފެންނަން ހުންނާނެއެވެ.
އެމްޕީއެލްއިން މަޢުލޫމާތު ދެއްވިގޮތުގައި، މި ޕޯޓަލްގައި ރަޖިސްޓްރީކޮށްފައިވާ ފަރާތްތަކަށް އިތުރު ފީއަކާއި އަދި ރަޖިސްޓްރޭޝަނަކާ ނުލައި މި ޚިދުމަތް ލިބޭނެއެވެ. އަދި އެއް ވަގުތެއްގައި އެކި ނީލަންތަކުގައި ބައިވެރިވުމުގެ ފުރުސަތުވެސް ލިބިގެންދާނެއެވެ.
އެމްޕީއެލްގެ އޯކްޝަން ޕޯޓަލް ތަޢާރަފުކޮށްފައިވަނީ 2022 ވަނަ އަހަރުއެވެ. މި ޕޯޓަލްގެ މައިގަނޑު މަޤްޞަދަކީ މާލޭ ވިޔަފާރި ބަނދަރަށް ގެނެސް ގިނަ ދުވަސްވަންދެން ކްލިއަރ ނުކޮށް ހުންނަ މުދާ ވިއްކާލުމަށް ބާއްވާ ނީލަންތަކުގައި ވީހާވެސް ގިނަ ބައެއްގެ ބައިވެރިވުން ހޯދުމެވެ.
މީގެ ކުރިން އޯކްޝަން ޕޯޓަލްގައި ބައިވެރިވެވެނީ ހަމައެކަނި މާލޭގެ ބަނދަރުތަކުގެ ނީލަންތަކުގައި ކަމުގައިވީ ނަމަވެސް، މި އައު ޚިދުމަތާއެކު ރާއްޖޭގެ ކޮންމެ ތަނެއްގައި ހުރެގެންވެސް ހިތަދޫ ޕޯޓުގެ ނީލަންތަކުގައި ބައިވެރިވެވޭނެއެވެ. މީގެ އިތުރުން މުދާތައް ގަތުމަށް އޮންލައިންކޮށް ބައިވެރިވެ، ބިޑްކޮށް އަދި ފައިސާ ދެއްކުމުގެ ފުރުސަތުވެސް ލިބިގެންދާނެއެވެ.
އެމްޕީއެލްއިން ފާހަގަކުރިގޮތުގައި ހިތަދޫ ޕޯޓުން އާންމުގޮތެއްގައި ނީލަމުގައި ވިއްކަމުން ގެންދަނީ އެކިބާވަތުގެ މޯޓަރ ވެހިކަލްތަކެވެ.