ބައިނަލްއަޤްވާމީ މަސައްކަތްތެރީންގެ ދުވަހާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވި ޚިޠާބުގައި، ދަރިން ތަރުބިއްޔަތު ކުރުމުގައި މަސައްކަތްތެރިކަމުގެ ރޫހު އަށަގެންނެވުމަށް ބެލެނިވެރިން އިސްކަންދިނުމަށް ގޮވާލައްވައިފިއެވެ.
ޤައުމީ ތަރައްޤީގައި މަސައްކަތްތެރިންގެ ދައުރު ފާހަގަކުރައްވަމުން ރައީސް މުޢިއްޒު ވިދާޅުވީ، ދިވެހިރާއްޖޭގެ ކުރިމަގު ބިނާވެގެންދާނީ މަސައްކަތްތެރި މުޖުތަމަޢެއްގެ މައްޗަށް ކަމަށެވެ. އަދި މިކަން ހާސިލުކުރުމަށްޓަކައި ކޮންމެ ދިވެއްސަކީވެސް އުފެއްދުންތެރި މަސައްކަތްތެރިއަކަށް ހެދުމަކީ މުހިންމު ކަމެއް ކަމުގައި ވިދާޅުވިއެވެ.
ސަރުކާރުގެ އިސްކަންދިނުމުގެ ތެރޭގައި އިޤްތިޞާދީ މަސައްކަތްތައް އިތުރުކުރުމާއި ވަޒީފާގެ ފުރުސަތުތައް ފުޅާކުރުން ހިމެނޭކަމަށް ފާހަގަކުރައްވަމުން، ތަޢުލީމީ ނިޒާމުގައި މަސައްކަތުގެ އަޚްލާޤާއި ހުނަރު ދަސްކޮށްދިނުމަށް އިތުރު އިސްކަމެއް ދޭންޖެހޭކަމަށް ރައީސް މުޢިއްޒު ވިދާޅުވިއެވެ.
އިސްލާމީ ތަޢުލީމުތަކުގައިވެސް މަސައްކަތްތެރިކަމުގެ މުހިންމުކަން ފާހަގަކުރައްވަމުން، ކޮންމެ މުސްލިމަކީވެސް އެމީހެއްގެ ކުޅަދާނަކަމާ އެއްވަރަށް މަސައްކަތްކުރާ މީހަކަށް ވާންޖެހޭނެކަމަށް ރައީސް އިލްތިމާސްކުރެއްވިއެވެ.
ޚިޠާބު ނިންމަވާލެއްވުމުގެ ގޮތުން ރައީސް މުޢިއްޒު ވިދާޅުވީ، ދިވެހި އުއްމަތުގެ ހަކަތައަކީ ޤައުމުގެ ހީވާގި މަސައްކަތްތެރިންކަމަށާއި، މިއަދު ދިވެހިރާއްޖެ މިހާ ކުރިއަރާފައިވަނީ މަސައްކަތްތެރިންގެ ހިތްވަރާއި ގަދައަޅައި މަސައްކަތް ކުރުމުގެ ސަބަބުންކަމަށެވެ. އަދި ޤައުމުގެ މުސްތަޤުބަލް އުޖާލާވެގެންދާނީވެސް މަސައްކަތްތެރިންގެ އަތްތަކުންކަމަށް އެމަނިކުފާނު ވަނީ ފާހަގަކުރައްވާފައެވެ.