ހުޅުމާލޭގައި މީހުން އާބާދުވިތާ 21 އަހަރު ފާހަގަކުރުމަށް ކުރިއަށް ގެންދިއަ “މައި ހުޅުމާލެ ފެސްޓިވަލް” ކާމިޔާބުކަމާއެކު ނިންމާލައިފިއެވެ.
ތަފާތު އެކި ހަރަކާތްތަކާއެކު ހަފްތާއަކަށް ބަހާލައިގެން ކުރިއަށް ގެންދިޔަ މި ފެސްޓިވަލް ނިންމާލާފައިވަނީ މިއަދު ހަވީރުއެވެ.
މި ފެސްޓިވަލް ނިންމާލާފައިވަނީ މިއަދު ހުޅުމާލެ ބީޗުގައި ކުރިއަށް ގެންދިއަ “ހުޅުމާލެ ބީޗް ފެސްޓް” އިވެންޓުންނެވެ. ތަފާތު ގިނަ ކުޅިވަރު މުބާރާތްތަކާއި، ގިނަ ހަރަކާތްތަކާއެކު މިއަދު ހެނދުނު ފެށި ބީޗް ފެސްޓް ވެސް ވަނީ ހަވީރު ނިންމާލާފައެވެ.
ހުޅުމާލެ ބީޗުގައި މިއަދު ކުރިއަށް ގެންދިޔަ ބީޗް ފެސްޓްގައި ވަނީ ބީޗް ގިނަ މުބާރާތްތަކެއް ވެސް ކުރިއަށް ގެންގޮސްފައެވެ. ފޯރިއާއެކު ކުރިއަށް ދިޔަ މި ފެސްޓުގައި ބީޗް ވޮލީ އާއި ބީޗް ހޭންޑްބޯލްގެ އިތުރުން ބީޗް ފުޓްބޯޅަ މުބާރާތްތައް ކުރިއަށް ގެންދިޔައެވެ.
މީގެ އިތުރުން ކެނޯ ރޭހާއި ވާދެމުން ފަދަ ކުޅިވަރުތައް ވެސް މި ފެސްޓްގައި ވަނީ ކުރިއަށް ގެންގޮސްފައެވެ. ހަމައެއާއެކު ތަފާތު ސްޓޯލްތަކާއެކު ކުޑަކުދިންނަށް ކުޅެވޭނެ ސްޓޯލްތައް ވެސް އެ ސަރަހައްދުގައި ބެހެއްޓިއިރު، އާއިލާއާއެކު މޫދުގެ އެކި ކުޅިވަރުތަކުގައި ހިލޭ ބައިވެރި ވުމުގެ ފުރުސަތު ވެސް މި ފެސްޓްގައި އޮތީ ހުޅުވާލާފައެވެ.
މި ފެސްޓް ނިންމާލުމުގެ ކުރިން ސަގާފީ އެކިއެކި މަސައްކަތްތައް ދައްކާލުން ވެސް މިއަދު ހަވީރު ހުޅުމާލެ ބީޗުގައި ވަނީ ކުރިއަށް ގެންގޮސްފައެވެ. ތަރުހީބު ބޮޑު އިވެންޓުގައި ކުޅިވަރާ ހަށިހެޔޮކަމާއި ބެހޭ ވަޒީރު ރާފިއު ވެސް ވަނީ ބައިވެރިވެވަޑައިގެންފައެވެ.
މިއަދު ހެދުން ފެށިގެން ކުރިއަށް ދިޔަ މި ފެސްޓުގައި ނިންމާލުމަށް ކުރިއަށް ގެންދިޔަ ހަރަކާތުގައި މިއަދު ކުރިއަށް ދިޔަ މުބާރާތްތަކުގެ ޗެމްޕިއަންކަން ހޯދި ޓީމުތަކަށް މެޑަލް އާއި އިނާމު ވެސް ވަނީ ހަވާލުކޮށްފައެވެ.