ކާޑެއްދޫ އެއާޕޯޓްގައި ހުވަނި ގިނަވެ، އެކަމުގެ ކަންބޮޑުވުންތައް ދަނޑުވެރިކަމާއި ދިރޭތަކެއްޗާއި ބެހޭ ވުޒާރާގެ ސަމާލުކަމަށް އައުމާއިއެކު، އެވުޒާރާއިން ހުވަނި ކޮންޓުރޯލް ކުރުމަށް ބޭނުންވާ ފަންނީ އެހީތެރިކަން ފޯރުކޮށްދީފިއެވެ.
ކާޑެއްދޫ އެއާޕޯޓުގައި ހުވަނި ގިނަވެ، އެކަން ކޮންޓްރޯލުކުރުމަށް އެހީއަށް އެދި އެ ވުޒާރާއަށް އެ އެއާޕޯޓުން ސިޓީއެއް ނުވަތަ މެއިލްއެއްވެސް އައިސްފައި ނުވާކަމާށާއި މި ކަން އެވުޒާރާގެ ސަމާލުކަމަށް އައިސްފައިވަނީ ސޯޝަލްމީޑިއާގެ ޒަރީއާއިން ކަމަށްވެސް ދަނޑުވެރިކަމާއި ދިރޭތަކެއްޗާއި ބެހޭ ވުޒާރާއިން ހާމަކުރެއެވެ.
މި މައްސަލަ އެ ވުޒާރާގެ ސަމާލުކަމަށް އައުމާއިއެކު އެ ވުޒާރާގެ ކަމާއިގުޅުންހުރި އިދާރާއިންވަނީ އެ އެއާޕޯޓަށް ގުޅާ، އެތަނުގައި މީގެކުރިން ޢަމަލުކުރައްވާފައިވާގޮތް ބައްލަވައި، އިތުރަށް ކުރެވިދާނެ ކަންކަމާއިގުޅޭގޮތުގެ މައުލޫމާތު ދެއްވާފައެވެ. އަދި ހުވަނި ކޮންޓްރޯލްކުރުމާއި ބެހޭ ފަންނީ މަޢުލޫމާތު ކަރުދާސް އެ އެއާޕޯޓަށް ވަނީ މެއިލްކޮށްފައެވެ.
މީހުން ދިރިއުޅޭރަށްތަކުގައި ހުވަނި ކޮންޓްރޯލް ކުރުމަކީ ރަށުކައުންސިލްގެ ޒިންމާއެކެވެ. އެހެންނަމަވެސް އެކަމަށް ބޭނުންވާ ފަންނީ އެހީތެރިކަން އެ ވުޒާރާއިން ފޯރުކޮށްދޭނެއެވެ.