ފަލަސްޠީނުގެ ޣައްޒާގެ މަޢުޞޫމު ރައްޔިތުންނަށް އިސްރާއީލުން ދެމުންދާ އަނިޔާވެރި ޙަމަލާތައް ވަގުތުން ހުއްޓުވުމަށް ބައިނަލްއަޤްވާމީ މުޖުތަމަޢުއަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮވާލައްވައިފިއެވެ.
އިސްރާއީލުގެ އަނިޔާވެރި ޢަމަލުތަކާ ގުޅިގެން ރައީސް މުޢިއްޒު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ކުށެއްނެތް އާންމު ރައްޔިތުންނަށް އަމާޒުކޮށް އިސްރާއީލުން ދެމުންދާ ޙަމަލާތަކަކީ އެއްވެސް ހާލެއްގައި ޤަބޫލުކުރެވޭނެ ކަމެއް ނޫން ކަމަށެވެ. އަދި މި ޙަމަލާތަކުގެ ޒިންމާ އިސްރާއީލުން ނަގަންޖެހޭނެ ކަމަށް ރައީސް ވިދާޅުވިއެވެ.
“ބައިނަލްއަޤްވާމީ ޤާނޫނުތަކާ އެއްގޮތަށް ޣައްޒާގެ ރައްޔިތުންގެ ފުރާނަ ރައްކާތެރިކުރުމަކީ މުޅި ދުނިޔޭގެ ޒިންމާއެއް. އަދި މިކަމުގައި ވަގުތުން ފިޔަވަޅު އަޅަންޖެހޭ,” ރައީސް މުޢިއްޒު ވިދާޅުވިއެވެ.
މީގެ ކުރިން އދ. ގެ 79 ވަނަ އާންމު މަޖިލީހުގައި ވާހަކަފުޅު ދައްކަވަމުން ރައީސް މުޢިއްޒު ވަނީ، ފަލަސްޠީނުގެ މިނިވަން ދައުލަތެއް ޤާއިމުކުރުމަށް ދިވެހިރާއްޖެއިން ފުރިހަމަ އެއްބާރުލުން ދޭނެކަން އަދި މިކަމުގައި ދިވެހިރާއްޖޭގެ ސިޔާސަތު ބަދަލުނުވާނެކަން ހާމަކުރައްވާފައެވެ.
އިސްރާއީލުގެ ޢުދުވާނީ ޙަމަލާތައް ފެށުނު 2023 ވަނަ އަހަރުގެ އޮކްޓޫބަރު 7 އިން ފެށިގެން މިހާތަނަށް 61,700 އަށްވުރެ ގިނަ ފަލަސްޠީނު ރައްޔިތުން ވަނީ ޝަހީދުވެފައެވެ. އަދި 120,000 އަށްވުރެ ގިނަ މީހުން ވަނީ ޒަޚަމްވެފައެވެ. މީގެ އިތުރުން، ޣައްޒާގެ ގިނަ އަދަދެއްގެ އާންމު ރައްޔިތުންގެ ގެދޮރާއި މުހިންމު އުމްރާނީ ވަސީލަތްތައް ވަނީ އިސްރާއީލުގެ ހަމަލާތަކުގައި ފުނޑުފުނޑުވެ، އެތައް ބަޔަކު ހިޖުރަކޮށްފައިވެއެވެ.