ހދ. ކުޅުދުއްފުށި ޕޯޓް ބޮޑުކުރުމުގެ މަޝްރޫއު ފެށުމަށް އިކޮނޮމިކް މިނިސްޓްރީ އާއި މޯލްޑިވްސް ޕޯޓްސް ލިމިޓެޑް (އެމްޕީއެލް) އާ ދެމެދު މިއަދު އެއްބަސްވުމެއްގައި ސޮއިކޮށްފި އެވެ.
މި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ މިނިސްޓަރު މުހައްމަދު ސައީދެވެ. އެމްޕީއެލްގެ ފަރާތުން ސޮއިކުރެއްވީ ސީއީއޯ، ޑީސީޕީ (ރިޓަޔާޑް) މުހައްމަދު ރިޝްވާނެވެ.
އެމްޕީއެލް އާއި އިކޮނޮމިކް މިނިސްޓްރީން މިއަދު ނެރުނު ޖޮއިންޓް ނޫސް ބަޔާނުގައި ބުނީ، އެ މަޝްރޫއުގެ އަމާޒަކީ ހއ.، ހދ.، ށ.، ނ. އަދި ވަށައިގެންވާ ރަށްތަކަށް ހިދުމަތް ލިބޭނެހެން ކުޅުދުއްފުށީގައި އުތުރުގެ ރަށްތަކަށް ހާއްސަކޮށް ލޮޖިސްޓިކަލް ހަބެއް ތަރައްގީކުރުން ކަމަށެވެ.
އެކި ފިޔަވަހިތަކަކަށް ބަހާލައިގެން ކުރިއަށް ގެންދާ އެ މަޝްރޫއުގެ ދަށުން ކުޅުދުއްފުށި ޕޯޓްގެ ކެޕޭސިޓީ އިތުރުކޮށް، ކާގޯ ހޭންޑްލިން ސިސްޓަމްތައް ޒަމާނީ ފެންވަރަށް ތަރައްގީކުރާނެއެވެ. އަދި ތަރުކާރީ އާއި މޭވާ ފަދަ ބާވަތްތައް ތާޒާކަންމަތީ ބެހެއްޓޭނެ ވަސީލަތްތައް ގާއިމުކުރުމަށްވެސް ހަމަޖެހިފައިވެއެވެ.
އެ ބަޔާނުގައި އިތުރަށް ބުނީ، ރައީސް ޑރ. މުހައްމަދު މުއިއްޒުގެ ވައުދުފުޅުތަކުގެ ތެރޭގައި ހިމެނޭ ކުޅުދުއްފުށި ބަނދަރު ބޮޑުކުރުމުގެ މަޝްރޫއު ފަށައިގަތުމަށް މިއަދު އެއްބަސްވުމުގައި ސޮއިކުރުމަކީ ރާއްޖޭގެ އުތުރުން ފެށިގެން ދެކުނަށް ޝެޑިއުލް ކޮށްގެން އަތޮޅުތެރެއަށް މުދާ އުފުލާނެ ނިޒާމެއް ގާއިމުކުރުމަށް އެޅި ފުރަތަމަ ފިޔަވަޅު ކަމަށެވެ.
އަދި ސަރުކާރުގެ އަމާޒަކީ އަތޮޅުތެރޭގެ ސަޕްލައި ޗެއިންގެ އެފިޝިއެންސީ އިތުރުކޮށް، މުދާ ގެނައުމުގައި ކުރަންޖެހޭ ހަރަދު ކުޑަކޮށް ހެޔޮ އަގެއްގައި އަތޮޅުތަކަށް މުދާ އެތެރެކުރެވި ރާއްޖޭގެ އިގުތިސާދު ކުރިއަރައިގެން ދިއުމަށް ފަހި ފުރުސަތުތައް ހޯދައިދިނުން ކަމަށްވެސް ބުނެފައިވެ އެވެ.



