1446 ވަނަ އަހަރުގެ ޙައްޖު މޫސުމަށް ތައްޔާރުވުމުގެ ގޮތުން، ސަޢޫދީ އަރަބިއްޔާގެ މަސްޖިދުލް ޙަރާމާއި މަސްޖިދުއް ނަބަވީގެ ކަންތައްތައް ބަލަހައްޓާ އޮތޯރިޓީން ބުދަ ދުވަހު ކަޢުބާގެ އުރަކޮޅު (ކިސްވާ) ތިން މީޓަރުގެ އުސްމިނަށް އުފުއްލާލައިފިއެވެ.
މި އަހަރީ މަސައްކަތް ކުރިއަށް ގެންގޮސްފައިވަނީ އުރަކޮޅުގެ ތިރީކައިރި ފަރުވާތެރިކަމާއެކު އުފުއްލައި، އޭގެ ކަންމަތިތައް ވަކިކޮށް، ތިން މީޓަރުގެ އުސްމިނުގައި ރައްކާތެރިކަމާއެކު ހަރުކުރުމަށްފަހުއެވެ. އަދި ހުސްވެފައިވާ ދެ މީޓަރުގެ ސަރަހައްދުގައި ހުދު ކޮޓަން ފޮތިން ނިވާކުރެވިފައިވެއެވެ.
މި މަސައްކަތަކީ ޚާއްސަ ތަމްރީނު ލިބިފައިވާ ޓެކްނިކަލް ޓީމެއް މެދުވެރިކޮށް ކުރިއަށް ގެންދާ މަސައްކަތެކެވެ. މީގެ މަޤްޞަދަކީ ޙައްޖު މޫސުމުގެ އެންމެ ޕީކް ދުވަސްތަކުގައި ޠަވާފު ކުރާ ޙާޖީންގެ ސަބަބުން އުރަކޮޅަށް ގެއްލުން ލިބުމުން ސަލާމަތްކުރުމެވެ.
ކައުބާގެ އުރަކޮޅުގެ ތާރީޚު
އުރަކޮޅުގެ ކުލަ ތާރީޚުގައި ތަފާތު ދައުރުތަކުގައި ބަދަލުވެފައިވެއެވެ. ރަސޫލު ﷲ ﷺ ގެ ޒަމާނުގައި ކަޢުބާ ނިވާކުރެވިފައިވަނީ ހުދު އަދި ރަތް ކުލައިގެ ޔަމަނީ ފޮތިންނެވެ. އަބޫބަކުރުގެފާނާއި، ޢުމަރުގެފާނާއި، ޢުޘްމާނުގެފާނުގެ ޚިލާފަތުގެ ދައުރުގައި ހުދު ފޮތިން ނިވާކުރެވުނެވެ. އެއަށްފަހު އިބްނު ޒުބައިރު ރަތް ބްރޮކޭޑްއިން ނިވާކުރެއްވިއެވެ.
މައްކާ ހިސްޓޮރިކަލް ސެންޓަރުގެ ޑިރެކްޓަރު ޑރ. ފަވާޒް އަލް-ދަހާސް ވިދާޅުވި ގޮތުގައި އުރަކޮޅުގެ ކުލަ ބަދަލުވަމުން އައިސްފައިވަނީ އެ ޒަމާނެއްގެ މާލީ ތަނަވަސްކަމާ ގުޅިގެންނެވެ. ހުދު ކުލައަކީ އެންމެ ލުއި ކުލަ ނަމަވެސް، ގިނަ ދުވަހު ނުހިފެހެއްޓޭތީ، ފަހުން ކަޅު ބްރޮކޭޑްއަށް ބަދަލުކުރެވުނެވެ. މިއީ މިހާރުވެސް ބޭނުންކުރަމުންދާ ކުލައެވެ.