މާލޭ ކޮމާޝަލް ހާބަރުގައި މަސައްކަތްކުރާ މުވައްޒަފުންނަށް އަމާޒުކޮށްގެން ނުރައްކާތެރި ހާލަތްތައް ދެނެގަތުމާއި އޮކިއުޕޭޝަނަލް ހެލްތް އެންޑް ސޭފްޓީ (އޯއެޗްއެސް) ރިސްކް މެނޭޖްމަންޓް ތަމްރީން ޕްރޮގްރާމެއް ކުރިއަށް ގެންގޮސްފިއެވެ.
މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ހާމަކުރިގޮތުގައި މި ތަމްރީން ޕްރޮގްރާމަކީ 19 އިން 22 މެއި 2025 އަށް ކުރިއަށްގެންދެވުނު އިންޑަކްޝަން ސެޝަންތަކުގެ ޢަމަލީ މަރުހަލާއެވެ. މި ތަމްރީން ޕްރޮގްރާމުގައި އޮޕަރޭޝަންސް ޝިފްޓްތަކުގައި މަސައްކަތްކުރާ މުވައްޒަފުން ބައިވެރިވެފައިވެއެވެ.
ހެލްތް އެންޑް ސޭފްޓީ ޑިޕާޓްމަންޓުން އިސްނަގައިގެން ކުރިއަށްގެންދިޔަ މި ތަމްރީން ޕްރޮގްރާމުގައި މަސައްކަތުގެ މާހައުލުގައި ދިމާވެދާނެ ނުރައްކާތެރި ހާދިސާތައް ދެނެގަތުމާއި، އެފަދަ ހާދިސާތައް ހިނގުމަށް މެދުވެރިވެދާނެ އަސްލު ސަބަބުތަކާއި، އެކަންކަމަށް މަގުފަހިވާ ކަންތައްތައް ދެނެގަތުމަށް އަމާޒުކޮށް ޚާއްސަ މަޝްވަރާތަކެއް ކުރެވުނުކަމަށް އެމްޕީއެލުން ބުނެފައި ވެއެވެ.
އެމްޕީއެލުން އިތުރަށް ބުނިގޮތުގައި މި ތަމްރީން ޕްރޮގްރާމުގެ މައިގަނޑު މަޤްޞަދަކީ މުވައްޒަފުންނަށް ދިމާވެދާނެ ނުރައްކާތެރި ހާލަތްތައް ކުޑަކުރުމަށް އަޅަންޖެހޭ ފިޔަވަޅުތައް އެޅުމަށް ބޭނުންވާ މަޢުލޫމާތު ފޯރުކޮށްދިނުން ކަމަށެވެ.