ސަރުކާރުގެ ދެ މުހިންމު ކުންފުންޏެއްގެ އިސް މަޤާމުތަކަށް އައު ބޭފުޅުން މިއަދު އައްޔަންކޮށްފިއެވެ. މިގޮތުން މޯލްޑިވްސް އެއަރޕޯޓްސް ކޮމްޕެނީ (އެމްއޭސީއެލް) ގެ ޗެއަރޕާސަންގެ މަޤާމަށް ހ. ސީސައިޑް އައިޝަތު ނޫރައިން ޖަނާހު އަދި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ޗެއަރމަންގެ މަޤާމަށް މ. ލާލުބާގް އަހުމަދު ޝަހީރު ވަނީ އައްޔަންކޮށްފައެވެ.
މި ދެ މަޤާމަށް މި ދެ ބޭފުޅުން އައްޔަންކުރި ކަމަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން މިއަދު ވަނީ އިއުލާންކޮށްފައެވެ. އެމްއޭސީއެލްގެ ޗެއަރޕާސަންގެ މަޤާމަށް އައްޔަންކުރި ނޫރައިން އަކީ ޗާޓަޑް އެކައުންޓެންޓެއްގެ ގޮތުގައި ނިއުޒިލޭންޑުގައި ގިނަ ދުވަސްތަކެއް ވަންދެން މަސައްކަތްކުރައްވާފައިވާ ބޭފުޅެކެވެ.
ނޫރައިން އަކީ މީގެ ކުރިން މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ގެ ޗެއަރޕާސަންގެ މަޤާމު ފުރުއްވާފައިވާ ބޭފުޅެކެވެ. އެ މަޤާމުގައި ހަ މަސްދުވަހު ހުންނެވުމަށްފަހު މިދިޔަ އަހަރުގެ މޭ މަހު އިސްތިއުފާ ދެއްވިއެވެ.
އެޗްޑީސީގެ ޗެއަރމަންކަމަށް އައްޔަންކުރެވުނު ޝަހީރަކީ ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގައި 29 އަހަރުގެ ދިގު މުއްދަތެއްގައި ޚިދުމަތްކުރައްވާފައިވާ ބޭފުޅެކެވެ. އޭނާ އެސްޓީއޯގެ މެނޭޖިންގ ޑިރެކްޓަރުކަން ކުރައްވާފައިވަނީ 2015 އިން 2018 އަށެވެ. އަދި މީގެ އިތުރުން ފެނަކަ ކޯޕަރޭޝަންގެ ޗެއަރމަންކަން ވެސް ކުރައްވާފައިވެއެވެ.
އެމްއޭސީއެލްގެ ޗެއަރމަންގެ މަޤާމު ހުސްވެފައިވަނީ މުހައްމަދު އުމަރު މަނިކު (އެމްޔޫ މަނިކު) ބަލި ހާލަތު ހުރި ގޮތުން މަޤާމުގެ މަސްއޫލިއްޔަތު އަދާނުކުރެވޭ ކަމަށް ވިދާޅުވެ މިދިޔަ އަހަރުގެ ޖެނުއަރީ 28 ވަނަ ދުވަހު އިސްތިއުފާ ދެއްވުމާ ގުޅިގެންނެވެ. އަދި އެޗްޑީސީގެ ޗެއަރމަންގެ މަޤާމު ހުސްވެފައިވަނީ އެންމެ ފަހުން އެ މަޤާމުގައި ހުންނެވި އަހުމަދު ނާސިފް (ޑީޑީ) މިދިޔަ މާޗު މަހު ވެމްކޯގެ ޗެއަރމަންކަމަށް ބަދަލުކުރެއްވުމާ ގުޅިގެންނެވެ.