ހުޅުމާލޭ ސެންޓްރަލް ޕާކުގައި އޮތް އީދު ހަވީރުގައި ހުރި ސްޓޯލްތަކުގެ ތެރެއިންވެސް އެންމެ ފާހަގަކުރެވެނީ އެމްޕީއެލްގެ ސްޓޯލެވެ. މި ސްޓޯލް ވެގެން ގޮސްފައިވަނީ ކުޑަކުދިންނަށް ހާއްސަ، މަޖާ އަދި އުފެއްދުންތެރި ތަޖުރިބާތަކަކުން ފުރފައިވާ ސްޓޯލަކަށެވެ. އެމްޕީއެލުން ވަނީ މި ހަވީރުގައި އިހުޒަމާނުގައި ކުޑަކުދިންނަށް ކިޔައިދީފައި ހުރި ފުލޯކު ވާހަކަތަކަށް އައު ސިފައެއް ގެނެސްދީ ކުޑަކުދިންގެ ހިތްތަކަށް އުފާވެރިކަމާއި ހިނިތުންވުން ގެނުވައިދީފައެވެ.
ފޫޅުދިގު ހަންޑިގެ އާ ވާހަކައެއް!
މި ސްޓޯލްގައި އެންމެ ފާހަގަކޮށްލެވުނު އެއް ކެރެކްޓަރަކީ ފޫޅުދިގު ހަންޑިއެވެ. އޭނާގެ ދިގު ފޫޅަކީ ރަށުގެ މީހުންނަށް ލިބިފައިވާ ނިޢުމަތެއްގެ ގޮތުގައި ސިފަކޮށްދީ، ސުޕަހީރޯއެއްގެ ގޮތުގައި ތަމްސީލުކޮށްދިނުމުން ކުޑަކުދިންގެ މެދުގައި ވަރަށް ބޮޑު މަޤްބޫލުކަމެއް ލިބިގެން ދިޔައެވެ. އަދި މި ސްޓޯލްގައި ކުދިންނަށް ފޫޅުދިގު ހަންޑިއާއެކު ފޮޓޯނެގުމާއި، އޭނާގެ ވާހަކަ އަޑުއެހުމުގެ ފުރުސަތު ލިބުނެވެ.
ސަފަރު ކަތްދަގެ ޖާދޫގެ ދުނިޔެ!
މި ސްޓޯލުގައި ކަނޑުގެ އެންމެ ފުނުން އަރައިގެން އަންނަ ސަފަރު ކަތްދަގެ ކެރެކްޓަރުގެ ސަމާލުކަންވެސް ކުޑަކުދިން ވަނޯ ވަރަށް ބޮޑަށް ހޯދާފައެވެ. ކަނޑުއަޑީގެ ޖާދޫގެ ދުނިޔެ ތަމްސީލުކޮށްދޭ މި ކެރެކްޓަރާއެކު ކުޅިވަރުތަކާއި ހަރަކާތްތަކުގައި ބައިވެރިވުމުގެ ފުރުސަތު ކުދިންނަށް ލިބުނެވެ.
އުފެއްދުންތެރި ހަރަކާތްތަކެއް!
މި ސްޓޯލްގައި ކުލަޖެއްސުމާއި، ވާހަކަ ކިޔައިދިނުމާއި، ފޮޓޯ ނެގުމުގެ ޚާއްޞަ ހަރަކާތްތައް ހިމަނާފައިވެއެވެ. އަދި ކޮންމެ ކޯނާއެއްގައި ވެސް އުފާވެރި ޕްރޮގްރާމްތަކާއި ކުޅިވަރުތައް ރޭވިފައި ހުރުމުން، ކުދިންނަށް ހިތްގައިމު، މަޖާ ތަޖުރިބާއެއް ލިބިގެން ދިޔަކަން އެމްޕީއެލުން ފާހަގަކޮށްފައިވެއެވެ.
މި ޚާއްޞަ އީދު ހަވީރު ކުރިއަށްދާނީ ޖޫން 6 އިން 8 އަށް، ކޮންމެ ދުވަހެއްގެ ހަވީރު 4 އިން 6 އަށް ހުޅުމާލޭ ސެންޓްރަލް ޕާކުގައެވެ.



