އިހަވަންދިއްޕޮޅު އޯ.ޕީ.އެލް ސަރަހައްދުގައި އުތުރު މެރިޓައިމް ސަރވިސް (ޔޫ.އެމް.އެސް) ގެ ދަށުން އެމް.އެސް.ސީ ވިންޑް 2 ކޮންޓެއިނަރ އުޅަނދަށް ތެޔޮ ސަޕްލައިކޮށްދީފިއެވެ.
މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މައުލޫމާތު ދެއްވާފައިވާ ގޮތުގައި، މި އުޅަނދަށް ބަންކަރިންގ ޚިދުމަތުގެ ދަށުން އެސްޓީއޯ މެދުވެރިކޮށް 250 މެޓްރިކް ޓަނުގެ ތެޔޮ ސަޕްލައި ކޮށްދީފައިވެއެވެ.
ކެނިޔާގެ މޮމްބާސާއިން ފުރައިގެން އިންޑިއާގެ ވިޝިންޖަމްއަށް ދަތުރުކުރަމުންދާ މި އުޅަނދަށް ޚިދުމަތް ފޯރުކޮށްދިނުމަކީ، އުތުރު މެރިޓައިމް ސަރވިސްގެ ޤާބިލުކަން އިތުރުވަމުން އަންނަކަން ދައްކުވައިދޭ ކަމެއް ކަމުގައި އެމްޕީއެލްއިން ފާހަގަކުރައްވައެވެ.
އުތުރު މެރިޓައިމް ސަރވިސްއަކީ ރާއްޖޭގެ އުތުރުގައި ބައިނަލްއަޤްވާމީ ކަނޑުމަގުން ދަތުރުކުރާ އުޅަނދުފަހަރަށް ޚިދުމަތް ފޯރުކޮށްދިނުމަށް އެމްޕީއެލްއިން ޤާއިމްކޮށްފައިވާ ޚިދުމަތެކެވެ. މި ޚިދުމަތުގެ ދަށުން ޕައިލެޓޭޖް އަދި ބަންކަރިންގ ފަދަ އެކި ޚިދުމަތްތައް ފޯރުކޮށްދެމުން ގެންދެއެވެ.