ރާއްޖޭގެ ހުރިހާ ސްކޫލެއް އެއަރކޮންޑިޝަން ކުރުމަށް ސަރުކާރުން ކުރިއަށްގެންދާ “ކޫލް ސްކޫލް” ޕްރޮޖެކްޓްގެ މަސައްކަތް މިއަހަރު ނިމުމުގެ ކުރިން ނިންމާލެވޭނެ ކަމަށް އެޑިޔުކޭޝަން މިނިސްޓަރ ޑރ. އިސްމާޢީލް ޝަފީޢު މިއަދު ވިދާޅުވެއްޖެއެވެ.
“މަތީ އަރުތަވެރީންގެ އިނާމު 2024” ގެ ތިންވަނަ ދަންފަޅީގައި ވާހަކަފުޅު ދައްކަވަމުން މިނިސްޓަރ ވިދާޅުވީ، ދަރިވަރުންނާއި މުދައްރިސުންނަށް ފަހި މާހައުލެއް ގާއިމުކޮށްދިނުމަކީ ސަރުކާރުގެ އިސް އަމާޒެއް ކަމަށެވެ. އަދި މިކަމަށްޓަކައި ގިނަ މަސައްކަތްތަކެއް ކުރަމުންދާ ކަމަށް ވެސް ވިދާޅުވިއެވެ.
މިނިސްޓަރ ޝަފީޢު ވިދާޅުވި ގޮތުގައި ހޫނުގަދަ މާހައުލެއްގައި ކިޔެވުމަކީ ދަރިވަރުންނަށް ވެސް މުދައްރިސުންނަށް ވެސް ގޮންޖެހުންތަކެއް ހުރި ކަމެކެވެ. އެހެންކަމުން މި މައްސަލަ ހައްލުކުރުމަށް ރޭވިފައިވާ “ކޫލް ސްކޫލް” ޕްރޮޖެކްޓްގެ ދަށުން ސެޕްޓެންބަރު މަހުގެ ނިޔަލަށް ހުރިހާ ސްކޫލަކަށް އޭސީ ހަރުކުރެވޭނެއެވެ.
އެޑިޔުކޭޝަން މިނިސްޓްރީގެ ބަޖެޓާ ގުޅޭގޮތުން ވާހަކަފުޅު ދައްކަވަމުން މިނިސްޓަރ ވިދާޅުވީ، 2025 ވަނަ އަހަރަށް ތައުލީމީ ދާއިރާއަށް 300 މިލިއަން ރުފިޔާގެ އިތުރު ބަޖެޓެއް ކަނޑައެޅިފައިވާ ކަމަށެވެ. މި ބަޖެޓުގެ ތެރެއިން “ކޫލް ސްކޫލް” ޕްރޮޖެކްޓާއި، ޓެކްނޮލޮޖީ އިންޓަގްރޭޝަން އަދި ޓީޗަރުން ތަމްރީނުކުރުމުގެ ޤައުމީ ޕްރޮގްރާމްތައް ހިންގުމަށް އެކަށީގެންވާ ފައިސާ ހިމެނިފައިވާ ކަމަށް ވެސް އެމަނިކުފާނު ވިދާޅުވިއެވެ.
“ދަރިވަރުންގެ ތައުލީމީ ފެންވަރު މަތިކުރެވޭނީ ދަރިވަރުންނަށް ދެވޭ ވަސީލަތްތައް އިތުރުކޮށް، އެކަށީގެންވާ މާހައުލެއް ގާއިމުކޮށްދީގެން،” މިނިސްޓަރ ވިދާޅުވިއެވެ. އަދި ދައުލަތުގެ ކެރިފޯރުންތެރިކަން ހުރި މިންވަރުން ތައުލީމީ ދާއިރާއަށް އިސްކަންދެމުންދާނެ ކަމަށް ވެސް އެމަނިކުފާނު ވިދާޅުވިއެވެ.