އއ. މަތިވެރީގައި ތަރައްގީކުރާ އެއަރޕޯޓުން ފަތުރުވެރިކަމުގެ ދާއިރާއަށް ގިނަ ފައިދާތަކެއް ކުރާނެކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސް މިހެން ވިދާޅުވެފައިވަނީ އއ. އަތޮޅަށް މިހާރުކުރައްވަމުން ގެންދަވާ ދަތުރުފުޅުގައި މަތިވެރީގެ ރައްޔިތުންނާ ބައްދަލުކުރެއްވާ ވާހަކަފުޅުދައްކަވަމުންނެވެ.
މި ބައްދަލުވުމުގައި މަތިވެރީގައި ބިންހިއްކައި، އެއަރޕޯޓް ތަރައްގީކޮށް ހިންގުމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއެކު އެއްބަސްވުމެއްގައި ސޮއިކޮށްފައިވެއެވެ. ރައީސް ވަނޯ އެއަރޕޯޓަށް ކަނޑައެޅިފައިވާ ބިމުގެ އިތުރުން، އާންމު ތަރައްގީއާއި ރައްޔިތުންގެ ބޭނުންތަކަށް 26.5 ހެކްޓަރުގެ ބިން އިތުރަށް ހިއްކާނެކަމަށް ވެސް ވިދާޅުވެފައެވެ.
މި މަޝްރޫޢަކީ ވިޔަފާރީގެ ގޮތުން ފައިދާ ކުރާނެ އަދި ފުރިހަމައަށް ކުރިއަށް ގެންދެވޭނެ މަޝްރޫޢެއްކަމަށް ވިދާޅުވެ، ބިން ހިއްކުމާއި އެންމެހައި އަސާސީ ވަސީލަތްތައް ގާއިމުކުރުމާއެކު، ދެ އަހަރާއި ހަ މަސްދުވަހުގެ ތެރޭގައި އެއަރޕޯޓް ނިންމައި ހިދުމަތްދޭން ފެށޭނެކަމުގެ ޔަގީންކަން ރައީސް ދެއްވިއެވެ.
ސިއްހަތާއި ތަޢުލީމީ ދާއިރާއާ ގުޅޭގޮތުން ވާހަކަފުޅު ދައްކަވަމުން، އައު ތަޢުލީމީ އަހަރު ފެށުމުގެ ކުރިން ސްކޫލް މަޝްރޫޢު ނިމޭނެކަމަށް ރައީސް ވިދާޅުވިއެވެ. ހެލްތު ސެންޓަރުގެ މަސައްކަތް ލަސްވަމުންދާތީ، އެހެން ކޮންޓްރެކްޓަރަކާ ހަވާލުކޮށްގެން މަސައްކަތް ނިންމުމަށާއި، މި ވަސީލަތް އިތުރަށް ފުޅާކޮށް ހިދުމަތްތައް ރަނގަޅުކުރުމަށް ރައީސް ވަޢުދުވެވަޑައިގެންނެވިއެވެ.
މީގެއިތުރުން، މަތިވެރީގެ މަގުހެދުމުގެ މަޝްރޫޢު އަންނަ އަހަރުގެ ބަޖެޓުގައި ހިމަނައި، ހަމަ އެ އަހަރު މަސައްކަތް ފެށޭނެކަމަށާއި، މި އަހަރު ހޭންޑްބޯޅަ ކޯޓެއް ތަރައްގީކުރުމަށް ހަމަޖެހިފައިވާކަން ރައީސް އިޢުލާންކުރެއްވިއެވެ. އަދި މަތިވެރީގެ ޓޫރިޒަމް ޒޯންގައި ކުރިން ޚިލާފު އުފެދިފައިވާ ބިން ރަށު ކައުންސިލާ ރަސްމީކޮށް ހަވާލުކުރެއްވިއެވެ.