ސިނަމާލެ ބްރިޖު ހުޅުވިތާ މިއަދު ހަތް އަހަރު ފުރޭއިރު، އެ ބިނާއަކީ ރާއްޖެ އާއި ޗައިނާގެ ގުޅުމާއި އިތުބާރުގެ ރަމްޒެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
2018 ވަނަ އަހަރުގެ އޮގަސްޓް 30 ވަނަ ދުވަހު ހުޅުވި މި ބްރިޖަކީ 200 މިލިއަން ޑޮލަރު ހޭދަކޮށްގެން ހެދި ބްރިޖެކެވެ. އޭގެ ތެރެއިން 116 މިލިއަން ޑޮލަރަކީ ޗައިނާގެ ހިލޭ އެހީ އެވެ. އަދި 72 މިލިއަން ޑޮލަރުގެ ލޯނު އެހީއެއް ދިން އިރު، ދިވެހި ސަރުކާރުން 12 މިލިއަން ޑޮލަރު ހޭދަކޮށްފައިވެ އެވެ.
ބްރިޖަށް ހަތް އަހަރު ފުރުމާ ގުޅިގެން އެކްސްގައި ރައީސް މުއިއްޒު ކުރެއްވި ޕޯސްޓެއްގައި ވިދާޅުވެފައިވަނީ މި ބްރިޖާ އެކު ގައުމަށް އާ މަގުތަކެއް ހުޅުވިގެންދިޔަ ކަމަށެވެ. އަދި އެއީ ރާއްޖެ އާއި ޗައިނާއާ ދެމެދު އޮތް އެއްބައިވަންތަކަމާއި އިތުބާރުގެ ހެއްކެއް ކަމަށް ވެސް ވިދާޅުވި އެވެ.
1.4 ކިލޯމީޓަރުގެ މި ބްރިޖަކީ މާލެ ސަރަހައްދުގައި އުޅޭ މީހުންގެ ދިރިއުޅުން ބަދަލުކޮށްލައި، ދަތުރުފަތުރަށް ވަރަށް ބޮޑު ލުޔެއް ގެނެސްދިން ބިނާއެކެވެ. މިހާރު ކޮންމެ ދުވަހަކު އެތައް ސަތޭކަ ބަޔަކު، މި ބްރިޖު ހުރަސްކޮށް، މާލެ އާއި ހުޅުލެ އަދި ހުޅުމާލެއާ ދެމެދުގައި ދަތުރުކުރެ އެވެ.