ޗައިނާގެ ރައީސް ޝީ ޖިންޕިންގ އާއި އެމަނިކުފާނުގެ އަނބިކަނބަލުން ޕެންގ ލިޔުއާންރައީސް ޑރ. މުހައްމަދު މުޢިއްޒަށް މެހެމާންދާރީ އަދާކޮށްފިއެވެ. މި މެހެމާންދާރީ އަދާކުރީ ޓިއަންޖިން މެއިޖިއަންގ ކޮންވެންޝަން އެންޑް އެގްޒިބިޝަން ސެންޓަރުގައި ބޭއްވި ރަސްމީ ފަރިއްކޮޅަކުންނެވެ.
މި ފަރިއްކޮޅު ބޭއްވީ ޗައިނާގެ ޓިއަންޖިންގައި ކުރިއަށްދާ ޝަންގްހާއި ކޯޕަރޭޝަން އޯގަނައިޒޭޝަން (އެސްސީއޯ) ސަމިޓަށް ޒިޔާރަތްކުރައްވާފައިވާ ދައުލަތްތަކުގެ އިސްވެރިންނާއި ބައިނަލްއަޤްވާމީ ޖަމިއްޔާތަކުގެ އިސްވެރިންގެ ޝަރަފުގައެވެ. ރައީސް މުޢިއްޒު މިހާރު ވަނީ ރައީސް ޝީ ޖިންޕިންގގެ ދަޢުވަތަކަށް އެސްސީއޯ ސަމިޓުގައި ބައިވެރިވެވަޑައިގަތުމަށް ޗައިނާއަށް ރަސްމީ ދަތުރުފުޅެއް ކުރައްވާފައެވެ.
2023 ވަނަ އަހަރުގެ ނޮވެމްބަރު މަހު ރައީސްކަމާ ހަވާލުވެވަޑައިގަތުމަށްފަހު މިއީ ރައީސް މުޢިއްޒު ޗައިނާއަށް ކުރައްވާ ދެވަނަ ދަތުރުފުޅެވެ. މިއީ ދިވެހިރާއްޖެއާއި ޗައިނާއާ ދެމެދު އޮތް ގުޅުން އިތުރަށް ބަދަހިވަމުންދާކަން ދައްކުވައިދޭ ކަމެކެވެ. 2001 ވަނަ އަހަރު އުފެދުނު އެސްސީއޯ އަކީ ޔޫރޭޝިއާ ސަރަހައްދުގެ ސިޔާސީ، އިޤްތިޞާދީ އަދި ސަލާމަތީ އެއްބާރުލުން އިތުރުކުރުމަށް މަސައްކަތްކުރާ ސަރަހައްދީ ޖަމިއްޔާއެކެވެ.