ދިވެހި ފުލުހުންގެ ޚިދުމަތް މަދަނީ ޚިދުމަތެއްގެ ގޮތުގައި ޤާއިމުކުރިތާ 21 އަހަރު ފުރުމާ ގުޅިގެން، ތެދުވެރިކަމާއި މުރާލިކަމާއެކު ދިވެހި ފުލުހުން ކުރައްވަމުންދާ މަސައްކަތަށް ރައީސް ޑރ. މުޙައްމަދު މުޢިއްޒު ޝުކުރު އަދާކުރައްވައިފިއެވެ. އެމަނިކުފާނު މި ޝުކުރު އަދާކުރެއްވީ ސޯޝަލް މީޑިއާގައި ހިއްސާކުރެއްވި ޕޯސްޓެއްގައެވެ.
ރައީސް ވަނީ ދުވަހުގެ ތަހުނިޔާ ފުލުހުންނާއި ފުލުހުންގެ ޢާއިލާތަކަށް ފޮނުއްވައި، ވާޖިބު އަދާކުރުމުގައި ރެޔާއި ދުވާލު ކުރައްވަމުންދާ ބުރަ މަސައްކަތަށް ޝުކުރު އަދާކުރައްވާފައެވެ.
ފުލުހުންގެ ޚިދުމަތް 2004 ވަނަ އަހަރު ސިފައިންގެ ޚިދުމަތުން ވަކިވެ، މަދަނީ ޚިދުމަތެއްގެ ގޮތުގައި ޤާއިމުކުރެވުނު ފަހުން، އެ ޚިދުމަތަށް ގިނަގުނަ ކުރިއެރުންތަކެއް ލިބި، މިހާރު ވަނީ ރާއްޖޭގެ ހުރިހާ ރަށަކަށް ފުލުހުންގެ ޚިދުމަތް ފުޅާކުރުމުގެ މަސައްކަތް ފެށިފައެވެ.