އޯގަސްޓް މަހު ވޭޕާ ގުޅުންހުރި 11 މައްސަލައެއް ރިކޯޑުކޮށް، އެކި މައްސަލަތަކުގައި 30 މީހަކު ވަނީ ޖޫރިމަނާކޮށްފައިވާކަމަށް ދިވެހި ފުލުހުންގެ ޚިދުމަތުން ބުނެފިއެވެ.
ފުލުހުން އާންމުކުރި ތަފާސްހިސާބުތަކުން ދައްކާގޮތުގައި، މި މައްސަލަތަކުގެ ތެރޭގައި ހިމެނެނީ އިލެކްޓްރޯނިކް ވޭޕާއި އެފަދަ އާލާތްތައް ގެންގުޅުމުގެ 4 މައްސަލައަކާއި، ވޭޕް ބޭނުންކުރުމުގެ 4 މައްސަލައެއްގެ އިތުރުން ވޭޕާ ގުޅޭ އެހެނިހެން 3 މައްސަލައެވެ.
މި މައްސަލަތަކުގައި ޖުމްލަ 150،000 ރުފިޔާއިން ޖޫރިމަނާކޮށްފައިވާއިރު، މީގެ ތެރެއިން ވޭޕާއި އިލެކްޓްރޯނިކް ވޭޕް އާލާތްތައް ގެންގުޅުނު 16 މައްސަލައެއްގައި 65،000 ރުފިޔާއިން ޖޫރިމަނާކޮށްފައިވެއެވެ. އަދި ވޭޕް ބޭނުންކުރުމުގެ 14 މައްސަލައެއްގައި 85،000 ރުފިޔާއިން ޖޫރިމަނާކޮށްފައިވާކަމަށް ފުލުހުން ވަނީ ހާމަކޮށްފައެވެ.
ފާއިތުވި އަހަރުގެ ޑިސެމްބަރު މަހުން ފެށިގެން ދުންފަތް ކޮންޓްރޯލްކުރުމާ ބެހޭ ޤާނޫނަށް ގެނެވުނު އިސްލާހާ ގުޅިގެން، ރާއްޖޭގައި ވޭޕް ބޭނުންކުރުމާއި، ގެންގުޅުމާއި، ވިއްކުމާއި އަދި ހިލޭ ބެހުން ވަނީ މަނާކޮށްފައެވެ. މި ޤާނޫނުގެ ދަށުން ވޭޕްގެ ބާވަތްތައް ރާއްޖެއަށް އެތެރެކޮށްފިނަމަ 50،000 ރުފިޔާއިން ޖޫރިމަނާކުރެވޭނެއެވެ. އަދި އެތެރެކުރާ ކޮންމެ އިލެކްޓްރޯނިކް ސިނގިރޭޓް ނުވަތަ ވޭޕަކަށް 10،000 ރުފިޔާގެ މަގުން ޖޫރިމަނާ ކުރެވޭނެއެވެ.