މަސްތުވާތަކެތި ބޭނުންކޮށް، ގެންގުޅެ އަދި ވިޔަފާރިކުރާ ކަމަށް ތުހުމަތުކުރެވޭ މައްސަލައެއްގައި މާލޭގައި ހިންގި އޮޕަރޭޝަނެއްގައި އައްޑޫ މަރަދޫގެ ދެ މީހަކު ހައްޔަރުކޮށްފިއެވެ.
ފުލުހުން މަޢުލޫމާތު ދިން ގޮތުގައި، މާފަންނު ސަރަހައްދުގެ ގެއެއް ބަލައި ފާސްކުރުމަށް ހިންގި އޮޕަރޭޝަނުގައި ތިން މީހަކު ހައްޔަރުކުރެވުނެވެ. މީގެ ތެރެއިން އެއް ފަރާތެއް ޝަރުތުތަކަކާއެކު ކޯޓުން ދޫކޮށްލާފައިވާ އިރު، މަރަދޫ ނަރުގިސްމާގޭ ޢަބްދުލްޣަނީ ޢަބްދުލްމަޖީދު (56 އަހަރު) އާއި ހަމަ އެ ގޭގެ އަޙްނަފް އަޝްރަފް (27 އަހަރު) ބަންދުގައި ބަހައްޓަން ނިންމައިފައިވެއެވެ.
އަންގާރަ ދުވަހު ހިންގުނު މި އޮޕަރޭޝަނުގައި، ގެއިން މަސްތުވާތަކެތި ކަމަށް ތުހުމަތުކުރެވޭ 304.73 ގްރާމްގެ އެއްޗެއް ފެނިފައިވާ ކަމަށް ފުލުހުން ބުނެއެވެ. މީގެ އިތުރުން މަސްތުވާތަކެތި ވިއްކައިގެން ހޯދާފައިވާ ކަމަށް ބެލެވޭ 41,500 ރުފިޔާއަށް ވުރެ ގިނަ ފައިސާވެސް އެ ތަނުން ފެނިފައިވެއެވެ.
ހައްޔަރުކުރެވުނު ދެ މީހުން ކްރިމިނަލް ކޯޓަށް ހާޒިރުކުރުމުން، ދެ މީހުންގެ މައްޗަށްވެސް 15 ދުވަހުގެ ބަންދުގެ މުއްދަތެއް ކަނޑައަޅައިފައިވެއެވެ. މި މައްސަލައިގެ ތަޙްޤީޤު ފުލުހުން ކުރިއަށް ގެންދާ ކަމަށް އެ ފަރާތުން މަޢުލޫމާތު ދީފައިވެއެވެ.