ދާދި ފަހުން އަމަލުކުރަން ފެށި ގޭންގު ކުށްތަކާ ބެހޭ އައު ގާނޫނުގެ ދަށުން ފުރަތަމަ ފަހަރަށް ތިން މީހަކު ފުލުހުންހައްޔަރުކޮށްފިއެވެ. މި ތިން މީހުންނަށްވެސް ތުހުމަތުކުރެވެނީ ނުރައްކާތެރި ހަތިޔާރު ގެންގުޅުމުގެ ކުށުގައެވެ.
ފުލުހުންގެ މި އޮޕަރޭޝަނުގައި ހައްޔަރުކުރެވުނު ފަރާތްތަކުގެ ތެރޭގައި މާލޭގެ މއ. މޯނިންވިއުގެ އިބްރާހިމް ޒައިދާން (22 އަހަރު) އާއި އެ ގޭގެ އަހްމަދު ނަވާޒް (30 އަހަރު)، އަދި ލ. މާބައިދޫ ބަށިމާގޭ މުހައްމަދު ޝިދާދު (22 އަހަރު) ހިމެނެއެވެ.
ކުރިމިނަލް ކޯޓުން މައްސަލަ ބެލުމަށްފަހު، ޒައިދާނާއި ޝިދާދު 15 ދުވަހުގެ މުއްދަތަށް ބަންދުގައި ބެހެއްޓުމަށް ނިންމާފައިވާއިރު، ނަވާޒު 30 ދުވަހުގެ މުއްދަތަށް ބަންދުގައި ބެހެއްޓުމަށް ވަނީ އަމުރުކޮށްފައެވެ. މި ނިންމުން ނިންމާފައިވަނީ ގޭންގު ކުށްތަކާބެހޭ ގާނޫނުގެ 58 ވަނަ މާއްދާގެ (ހ) އަދި (ނ) ގެ ދަށުންނެވެ.
ކޯޓުން މި މައްސަލަ ބެލުމުގައި ފާހަގަކޮށްފައިވާ ގޮތުގައި، މި ތިން ފަރާތްވެސް ބަންދުގައި ބަހައްޓަން ޖެހެނީ އެ މީހުންނަކީ މުޖުތަމައުގެ ސަލާމަތަށް ނުރައްކާވެދާނެ ފަރާތްތަކަކަށް ވާތީއެވެ.
މި ގާނޫނަކީ ގޭންގު ހަރަކާތްތަކާއި ނުރައްކާތެރި ކުށްތައް ހުއްޓުވުމަށް ޚާއްޞަ އަދަބުތަކެއް ކަނޑައަޅާފައިވާ ގާނޫނެކެވެ. މި ގާނޫނު ތަންފީޒުކުރަން ފުލުހުން ފަށާފައިވަނީ މިދިޔަ މަހުގެ 25 ވަނަ ދުވަހުއެވެ. މިއީ މި ގާނޫނުގެ ދަށުން ފުރަތަމަ ފަހަރަށް ކުރެވުނު ހައްޔަރުތަކެވެ.