ރަށްރަށުގެ ބޮޑުމިނަށް ބަލައިގެން ބަޖެޓު ކަނޑައެޅުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ރަށްރަށަށް ކުރައްވާ ޒިޔާރަތްތަކުގައި ކައުންސިލްތަކުން ހުށަހަޅާ ކަންކަމަށް ޢަމަލީ ސިފަ ގެނެސްދެއްވާކަމުގެ ހެއްކެއް ކަމަށް މިނިސްޓަރ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސް އާދަމް ޝަރީފު ޢުމަރު ވިދާޅުވެއްޖެއެވެ.
މިނިސްޓަރ ޝަރީފު މިފަދައިން ވިދާޅުވެފައިވަނީއެކްސްގައި ކުރެއްވި ޕޯސްޓެއްގައެވެ. އޭނާ ވިދާޅުވި ގޮތުގައި ލާމަރުކަޒީ ނިޒާމު ހަރުދަނާވެ، ކައުންސިލްތަކުން ރައްޔިތުންނަށް ދެވޭ ޚިދުމަތްތައް އިތުރުކުރެވޭނީ މާލީ ގޮތުން ކައުންސިލްތައް ބާރުވެރިވެ، ދެމެހެއްޓެނިވި ގޮތެއްގައި އާމްދަނީ އިތުރުކުރެވޭނެ ވިސްނުންތަކެއް އުފެދިގެންނެވެ.
މިނިސްޓަރ ޝަރީފު އިތުރަށް ފާހަގަކުރެއްވި ގޮތުގައި ރައްޔިތުންނަށް ބޭނުންވާ ޚިދުމަތްތައް ފޯރުކޮށްދެވޭނީ ކައުންސިލްތަކުގައި އެކަމުގެ ހަކަތަ ހުރެގެންނެވެ. އަދި ލާމަރުކަޒީ ނިޒާމު ހަރުދަނާކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވި ހަރުދަނާ ސިޔާސަތުތަކުގެ ސަބަބުން އިންސާފުވެރި ގޮތެއްގައި ކައުންސިލުތައް މާލީގޮތުން ބާރުވެރިވާނެ ކަމަށްވެސް އެކްސްގައި ކުރެއްވި ޕޯސްޓުގައި ފާހަގަކުރައްވާފައިވެއެވެ.