ކުރީގެ ރައީސުންނާއި ރައްޔިތުންގެ މަޖިލީހުގެ ކުރީގެ މެންބަރުންނަށް ދެމުންދާ އިނާޔަތްތައް މަދުކުރުމަށް ތާއީދުކުރައްވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ. އަދި އެއީ ރައްޔިތުން އެދޭ ގޮތްވެސް ކަމަށް ރައީސް ވިދާޅުވެފައިވެއެވެ.
ޕީއެންސީގެ މަޖިލިސް މެންބަރުން ހިމެނޭ ވަޓްސްއެޕް ގްރޫޕަކަށް އިއްޔެ ފޮނުއްވި މެސެޖެއްގައި ރައީސް މުއިއްޒު ވިދާޅުވެފައިވަނީ، ކުރީގެ ރައީސުންނާއި މަޖިލިސް މެންބަރުންނަށް ގާނޫނުގެ ދަށުން މިހާރު ދެމުންދާ އިނާޔަތްތައް މަދުކުރަން އެމަނިކުފާނަށް ފެނިވަޑައިގަންނަވާ ކަމަށެވެ.
މިހާރު އޮތް ގާނޫނުގެ ދަށުން އެއް ދައުރު ރައީސްކަން ކުރައްވާފައިވާ ބޭފުޅުންނަށް މަހަކު 50،000 ރުފިޔާ އަދި އެއް ދައުރަށްވުރެ ގިނަ ދުވަހު ރައީސްކަން ކުރައްވާފައިވާ ބޭފުޅުންނަށް މަހަކު 75،000 ރުފިޔާގެ އިނާޔަތެއް ދޭންޖެހެ އެވެ. މީގެ އިތުރުން ދިރިއުޅުއްވުމަށް 50،000 ރުފިޔާ އާއި އޮފީސް ހިންގުމަށް 175،000 ރުފިޔާ ދޭންޖެހެ އެވެ.