ރާއްޖޭގެ ހުރިހާ ސިޓީތަކާއި ރަށްރަށުގެ މަގުތަކާއި އާންމު ތަންތަން ދިއްލުމަށް ކައުންސިލްތަކަށް ފެނަކަ އަދި ސްޓެލްކޯއިން ބިލްކުރާނީ ޑޮމެސްޓިކް ރޭޓުން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ނިންމަވައިފިއެވެ. މި ބަދަލު އަމަލުކުރަން ފަށާނީ 2026 ވަނަ އަހަރުގެ ޖެނުއަރީ 1 ވަނަ ދުވަހުން ފެށިގެންނެވެ.
މިއީ ލާމަރުކަޒީ ނިޒާމު އިތުރަށް ތަރައްޤީ ކުރުމަށް އަޅުއްވާ ފިޔަވަޅެއްގެ ގޮތުގައި ރައީސް ވިދާޅުވެފައިވެއެވެ. މީގެ ކުރިން މަގުބައްތިތަކާއި، ޕާކްތަކާއި އަދި އާންމު މައިދާންތަކުގެ ކަރަންޓު ބިލް ނަގަމުން އައީ ގަވަރމަންޓު ރޭޓުންނެވެ. މި ބަދަލާ ގުޅިގެން ކައުންސިލްތަކަށް މުނިސިޕަލް އެހެން ޚިދުމަތްތަކަށް ޚަރަދުކުރަން ލިބޭ އަދަދު އިތުރުވެގެންދާނެ ކަމަށް ރައީސް މިރޭ “އެކްސް” ގައި ކުރެއްވި ޕޯސްޓެއްގައި ފާހަގަކުރައްވާފައިވެއެވެ.
ފާހަގަކޮށްލެވޭ ގޮތުގައި މިއީ ކައުންސިލްތަކަށް ލުއިފަސޭހަ ކޮށްދިނުމަށް ސަރުކާރުން އަޅުއްވާ ދެވަނަ ފިޔަވަޅެވެ. މީގެ ކުރިން މިދިޔަ އަހަރު ވަނީ މިސްކިތްތަކުގެ ކަރަންޓު ބިލު ވެސް ޑޮމެސްޓިކް ރޭޓުން ނެގުމަށް ހަމަޖައްސަވާފައެވެ. އަދި މި ބަދަލާ ގުޅިގެން ފެނަކަ އަދި ސްޓެލްކޯއަށް މަދުވާ އާމްދަނީ އެހެން އުސޫލަކުން ހަމަޖައްސައިދެއްވާނެ ކަމަށް ވެސް ރައީސް ވަނީ ވިދާޅުވެފައެވެ.