ރާއްޖެއަށް ވަގަށް ސިނގިރޭޓު އެތެރެކޮށް އޭގެ ވިޔަފާރި ކުރަމުންދާ ކަމުގެ މައުލޫމާތު ލިބެމުންދާތީ، މޯލްޑިވްސް ކަސްޓަމްސް ސަރވިސްއިން ހާއްސަ އޮޕަރޭޝަނެއް ފަށައިފިއެވެ. މި އޮޕަރޭޝަނުގެ ދަށުން ވަގަށް އެތެރެކޮށްފައިވާ ކަމަށް ބެލެވޭ ދުންފަތުގެ ބާވަތްތަކާއި ގަވާއިދާ ހިލާފަށް ވިއްކަމުންދާ ދުންފަތުގެ ބާވަތްތައް ނެގުމުގެ މަސައްކަތް ކުރިއަށް ގެންދާނެ ކަމަށް އެ އިދާރާއިން މިއަދު ނެރުނު އިއުލާނެއްގައި ބުނެފައިވެއެވެ.
ކަސްޓަމްސްއިން ބުނާ ގޮތުގައި، މި އޮޕަރޭޝަނުގެ ދަށުން ވަގަށް ދުންފަތް އެތެރެކޮށް އޭގެ ވިޔަފާރި ކުރަމުންދާ ފަރާތްތަކާ މެދު ގާނޫނީ ފިޔަވަޅު އަޅާނެއެވެ. އަދި ހެލްތު މިނިސްޓްރީން އާންމުކޮށްފައިވާ އިންޒާރުގެ ނޯޓިސް ނުޖަހައި ހުންނަ ދުންފަތުގެ ބާވަތްތަކުގެ ވިޔަފާރި ނުކުރުމަށް އެ އިދާރާއިން ވަނީ އިލްތިމާސްކޮށްފައެވެ.
ވަގަށް ދުންފަތް އެތެރެކޮށް އޭގެ ވިޔަފާރިކުރާ ކަމުގެ މައުލޫމާތު އެއްވެސް ފަރާތަކަށް ލިބިއްޖެނަމަ، އެ މައުލޫމާތު ކަސްޓަމްސްގެ ހިލޭ ގުޅޭ ނަންބަރު 1416 އަށް ގުޅައި ހިއްސާކޮށްދިނުމަށް ވެސް އެ އިދާރާއިން ވަނީ އާންމުންނަށް ގޮވާލައިފައެވެ. ފާހަގަކޮށްލެވޭ ކަމަކީ، މި ފަދަ މައްސަލަތައް ފެންމަތިވާން ފެށީ ދުންފަތް ކޮންޓްރޯލް ކުރުމާ ބެހޭ ގާނޫނު މި އަހަރުގެ ކުރީކޮޅުން ފެށިގެން ތަންފީޒު ކުރަން ފެށުމާ ގުޅިގެން ކަމަށްވުމެވެ.