ބ. ދޮންފަނު ބިން ހިއްކައިފިނަމަ ހަނިފަރު ބޭއަށް ގެއްލުންވާނެތީ، އެތައް ހާސް ބަޔަކު އިހުތިޖާޖު ކުރުމާ ގުޅިގެން އެ މަޝްރޫޢު ކުރިއަށް ނުގެންދަން ނިންމި ނަމަވެސް، އެ ރަށުގެ އެހެން މަޝްރޫޢުތައް ކުރިއަށް ގެންދާނެ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު މިއަދު ވިދާޅުވެއްޖެއެވެ.
ރައީސް ޑރ. މުޙައްމަދު މުއިއްޒު މިއަދު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، ދޮންފަނުގައި ބިން ހިއްކުމަށް ވައުދުވެވަޑައިގެންނެވީ އެ ރަށު ރައްޔިތުންގެ އެދުމުގެ މަތިން ކަމަށާއި، ނަމަވެސް މިހާރު ރައްޔިތުން އެކަމަށް ބޭނުންނުވާކަން އެނގިވަޑައިގެންނެވުމާ ގުޅިގެން އެ މަޝްރޫޢު ކުރިއަށް ނުގެންދަވާނެ ކަމަށެވެ.
މި ނިންމެވުމާ ގުޅިގެން މުއްތަލިބު ވިދާޅުވެފައިވަނީ ބިން ހިއްކުމުގެ މަޝްރޫޢު ކުރިއަށް ނުގެންދިޔަ ނަމަވެސް، ބަނދަރުގެ މައްސަލަ ހައްލުކުރުމާއި ގޮނޑުދޮށް ހިމާޔަތްކުރުމުގެ މަސައްކަތް ސަރުކާރުން ކުރިއަށް ގެންދާނެ ކަމަށެވެ.
400 އެއްހާ މީހުން ދިރިއުޅޭ ދޮންފަނުގައި 13 ހެކްޓަރުގެ ބިން ހިއްކުމަށް މިދިޔަ މަހުގެ 13 ވަނަ ދުވަހު އެމްޓީސީސީއާ ހަވާލުކުރުމާ ގުޅިގެން، ތިމާވެށި ހިމާޔަތްކުރާ ފަރާތްތަކުން ވަނީ ކަންބޮޑުވުން ފާޅުކޮށް، މަޝްރޫޢު ހުއްޓާލުމަށް ގޮވާލައި 5،000 އަށްވުރެ ގިނަ މީހުން ސޮއިކޮށްފައިވާ ޕެޓިޝަނެއް ހުށަހަޅާފައެވެ.