ހަރުކަށި ބައިނަލްއަޤްވާމީ ފިޔަވަޅުތައް އަލުން އަނބުރާ ތަންފީޒުކުރުމާ ގުޅިގެން، އދ. ގެ ނިއުކްލިއަރ ބެލެހެއްޓުމުގެ އިދާރާކަމަށްވާ އިންޓަނޭޝަނަލް އެޓޮމިކް އެނަރޖީ އޭޖެންސީ (އައިއޭއީއޭ) އާއި އެކު ހަދާފައި އޮތް އެއްބާރުލުން މިހާރު މުހިންމެއް ނޫން ކަމަށް އީރާނުގެ ފޮރިން މިނިސްޓަރު އައްބާސް އަރަޤްޗީ އާދީއްތަ ދުވަހު ވިދާޅުވެއްޖެއެވެ.
މި އެއްބަސްވުމަކީ ޖޫން މަހު އިޒްރޭލާއި އެމެރިކާއިން އީރާނުގެ ނިއުކްލިއަރ ފެސިލިޓީތަކަށް ހަމަލާދިނުމާ ގުޅިގެން ހުއްޓާލާފައިވާ އެއްބާރުލުން އަލުން ފެށުމަށް ވެފައިވާ އެއްބަސްވުމެކެވެ.
2015 ވަނަ އަހަރުގެ ނިއުކްލިއަރ އެއްބަސްވުމުގައި ސޮއިކޮށްފައިވާ ބްރިޓެން، ފްރާންސް އަދި ޖަރުމަނީއިން އދ. ގެ ފިޔަވަޅުތައް އަލުން ތަންފީޒުކުރުމަށް ނިންމުމާ ގުޅިގެން މި އެއްބަސްވުމުގެ މުހިންމުކަން ގެއްލިގެން ގޮސްފައިވާ ކަމަށް އަރަޤްޗީ ވިދާޅުވިއެވެ. އީރާނުން އެއްބަސްވުމާ ޚިލާފުވެފައިވާ ކަމަށް ބުނެ މި ޤައުމުތަކުން ފިޔަވަޅު އަޅަން ނިންމީ އީރާނުން ދެކޮޅު ހަދާ ކަމެކެވެ.
“ތިން ޔޫރަޕިއަން ޤައުމުތަކުން ހީކުރީ އެމީހުންގެ އަތުގައި ބާރެއް އޮތް ކަމަށް. އެކަމަކު މިހާރު އެ ބާރު ބޭނުންކޮށް ނަތީޖާ ފެނިއްޖެ. މި ތިން ޤައުމުގެ ދައުރު ވަރަށް ބޮޑަށް ކުޑަވެ، އެމީހުންނާއެކު މަޝްވަރާކުރުމުގެ ބޭނުން ވެސް ނެތިދާ ހިސާބަށް ގޮސްފި،” އަރަޤްޗީ ވިދާޅުވިއެވެ.
އައިއޭއީއޭއިން ދެފުށް ފެންނަ ސިޔާސަތެއް ގެންގުޅޭ ކަމަށް އީރާނުން ތުހުމަތުކޮށްފައިވެއެވެ. އޭޖެންސީން ނިއުކްލިއަރ ނޮން-ޕްރޮލިފަރޭޝަން ޓްރީޓީ (އެންޕީޓީ) ގެ ދަށުން އޮތް ޒިންމާތަކާ ޚިލާފަށް، އިޒްރޭލުން އީރާނުގެ ނިއުކްލިއަރ ސައިޓްތަކަށް ދިން ހަމަލާތައް ކުށްވެރިކޮށްފައި ނުވާ ކަމަށް އީރާނުން ބުނެއެވެ.
އެމެރިކާ އާއި އިޒްރޭލުގެ އިތުރުން ގިނަ ހުޅަނގުގެ ޤައުމުތަކުން އީރާނުން ނިއުކްލިއަރ ހަތިޔާރު އުފެއްދުމަށް މަސައްކަތްކުރާ ކަމަށް ތުހުމަތުކުރެއެވެ. ނަމަވެސް އީރާނުން މިކަން ވަރަށް ހަރުކަށި ގޮތެއްގައި ދެކޮޅު ހަދައެވެ. އެ ޤައުމުގެ ނިއުކްލިއަރ ޕްރޮގްރާމަކީ ހަމައެކަނި މަދަނީ ބޭނުންތަކަށް ކަމަށާއި، އެންޕީޓީގެ ދަށުން ޔުރޭނިއަމް އެންރިޗްކުރުމުގެ ހައްޤު އެ ޤައުމަށް ލިބިގެންވާ ކަމަށް އީރާނުން ބުނެއެވެ.